Pelşîn Çetînkaya

 

SÊRT - Cinî derheqê binpaykerdişê heqan ê serê tepişte û merdimê tepişteyan de vatî: “Na teda û zordarî tersonekîya înan a. Sebebê nê binpaykerdişê heqan tersê înan ê tekoşîn û hêzê ma yo.” 

 

Kurdistan û Tirkîya de tecrîd şîdet zêde keno û her raşteyê cuye de bi tesîr o. La tewr zêde zî serê tepişteyan de pê yeno. Tepişteyî nêeşkenê xo biresnê xizmetê weşî, aktîvîteyê komelkî, resnayîş û wayîrbîyayîşêke baş. Sewbîna bi veşênayîşê înfazan, surgunan tecrîd yeno rayîr ra berdiş. Vera nê binpaykerdişê heqan ke açarîyayo îşkenceyî muracatê seba mercîyan zî tu netîceyêk nêgêno. Hemsereka Komelaya Heqanê Merdiman (ÎHD) ya Sêrtî Sohbet Altan Çetîn, Endama Meclîsê Cinîyan a Platformê Konfederasyonê Sendîkayê Kedkarê Cemawerî (KESK) Seyran Şik Karabulut û Endama Genel Îşî ya Konfederaysonê Sendîkayê Karkerê Şoreşger (DÎSK) Narîn Erole derheqê binpaykerdişê heqan ê zîndanan de qisey kerd.

 

‘Binpaykerdişê heqan ê ke ma vanê vera tecrîdî de pê yenê’ 

 

Sohbet Altane da zanayîş ke tecrîdê zîndanan tena serê tepişteyan de nê serê merdimanê tepişteyan de zî pê yeno û wina vat: “Zîndanê Tirkîya û Kurdistanî de binpaykerdişê ke ma ci rê vanê tecrîd yeno ciwîyayîş. Îşkenceyê ke yenê kerdiş hem bi vatiş û hem zî fîzîkî yê. Zîndanê Panosî yê Agirî de tepişteyê ke nêweşê giranî û raporê înan ê nêweşxaneyî est o, serbest nînê verdayîş. No îşkence yo. Kişta înan de wexto ke înan benê nêweşxaneyan binê îşkenceyê giran de benê. Bi kelepçekerde derman kenê.” 

 

‘Binê nameyê polîtîkayê asayîşî de binpaykerdiş’

 

Sohbete dewamê qiseykerdişê xo de da zanayîş ke îqtîdar problemê kurdî bi rayîrê aştîyane nê, xîret keno ke bi ‘polîtîkayê asayîşî’ çareser bikero û vat: “No zî yeno manaya şîdet û tedaye. Vera binpaykerdişê heqan ma her cayî rê waştişname nuşt la agêrayîş çin o. Ganî îşkenceyê zîndanan bi lezkî peynî bibo. Bi taybetî tepişteyê nêweşî nînê tehlîyekerdiş. Ganî cigêrayîşê zitî bêro peynîkerdiş. Ganî waştişnameyan rê cewab bêro dayîş. Nê binpaykerdişî sucê merdimye yê. Nînê qebûlkerdiş.” 

 

‘Na teda tersonekîye vera yena kerdiş’ 

 

Narîn Erole zî ercnayîşê xo de ard ziwan ke îqtîdar bi nê binpaykerdişan vano qey do ser bikewo û coka ra muracatê nê binpaykerdişan keno. Narîn Erole wina dewam kerd: “Embazê ma qet nê caardişan qebûl nêkerdî. Ez zî zîndan de menda. Nika mêrdeyê mi tepişte yo. Wexto ke ma şinê zîndan cigêrayîşçê zitî bi ma yeno ferzkerdiş. Caardişê nê teda û zordestîyan ters vera yo. Ma baş vînenê ke têkoşîn û hêzê ma ra tersenê. La her demî de no raybaz est bî. Ma qet vera nê caardişan de tepîya game nêeşt.” 

 

‘Heqê merdiman binpay kenê’ 

 

Seyran Şike zî dîyar kerd ke no îşkence caardişê vera demokrasîyî yo û wina dewam kerd: “Prosesê peyêne de serê tepişteyê sîyasî de caardişê taybetî est ê. Tepişte raştê caardişê teberê merdimîye yenê. Nê caardişî her çend ke qanûnan de çinî bo zî pê yenê. Na rewşe sey sendika û rêxistinê komelê sivîlî her tim anê ziwan. La tu gamêk nîno eştiş. Ma do heme platformî vera nê caardişan de têkoşînê xo dewam bikerê.”