Marta Somek

 

 BALIKESÎR - Waya tepişte Hakki Aygunî ke 41 serrî yo tepişte yo û Leyla Aygune ya nêweşa kanserî ke di hewte verê cu ameye tepiştiş, Zekîye Aygune dîyar kerd ke cuya aye verê berê zîndanan de derbaz bîya û wina vat: “Beno ke ma teber de bê la ma zî bi tepişteyan reyde cuya tepişte ciwîyenê. Ma do taqîbkerdoxê têkoşînê tepişteyan bê. Seba peynîkerdişê tecrîdî ganî her kes bi hîsin têbigêro.” 

 

Binpaykerdişê heqan ê zîndanan dewam keno. Bi bahaneyê cîya û keyfî tehlîyekerdişê tepişteyan yeno astengkerdiş. Hakki Ayguno ke 41 serrî yo tepişte yo zî nê tepişteyan ra yew o. Hakkiyo ke nika Zîndanê Tîpê Tyî yê Karabukî de yo, mîyanê 41 serrî de surgunê xeylê zîndanan bî. 16ê Êlula 2023yî de cezaya ci temam bî la poşmanî ci rê ame ferz kerdiş. Semedo ke poşmanî qebûl nêkerd nêame veradayîş. 

 

Waya tepişte Hakki Aygun û Leyla Aygune ya nêweşa kanserî ke di hewte verê cu 14ê Adare de ameye tepiştiş, Zekîye Aygune dîyar kena ke waya aye nêweş a. Zekîyeye rayîrberîyê Partîya Têduştîye û Demokrasî (DEM Partî) de ca gêna û endama Komeleya Heqanê Merdiman (ÎHD) ya. Zekîye derheqê tecrîd û binpaykerdişê heqan ê zîndanan de qisey kerd. 

 

 Way û birayê aye tepişte yê 

 

Zekîye da zanayîş ke waya aye de nêweşîya kanserî est a û wina vat: “Birayê mi Hakki Aygunî 1984î de Bedlîs de ame tepiştiş. 8 serrî tepişte mend û dima ra bi qanûnê efûye serbest ame veradayîş. 1995î de reyna ame tepiştiş. 1996î de kewt rojeyê mergî. Nê prosesî de surgunê xeylê zîndanan ame kerdiş. tewr peynî berdê Karabukî. Waya mi Leyla zî di demê Kocaelî de hemserekatîye kerd. Endamtîya Meclîsê partiye kerd. Nêweşa kanserî ya. 14ê Adare de ameye tepiştiş.” 

 

Serê tepişteyan de ferzkerdişê poşmanîye 

 

Zekîyeye da zanayîş ke cuya înan verê zîndanan de derbaz bî û wina dewam kerd: “Ma bi tepişteyanê xo reyde tepişte yê. Cuya ma verê zîndanan de derbaz bî. Ma bajar bi bajar gêrenê. 41 serrî yo tepişte yo. 16ê Êlula 2023yî de cezaya ci temam bî. La poşmanî ci rê ferz kenê. Nika Karabuk de 16 tepişte paweyê tehîlîyeyê xo yê. Keye krîzê ekonomîye vera nêeşkeno şêro pêvînayîşan. Rewşa mi ya ekonomîye zî xirab a. Ma xeylê dej ancenê. Dayîka mi dejê birayê mi vera dinyaya xo bedelnaye. Pîyê mi rayna wina bî. Dima ra birayê mo dinyaya xo bedelnaye. Na rewşe seba tepişteyan dejêk pîl a.”

 

 ‘Ma do taqîbkerdoxê têkoşînî bê’ 

 

Zekîyeye dîyar kerd ke seba Hakki tewrê cenazeyan bibo muracat kerdê, la her çend ke heme bêrê qebûlkerdiş zî nêverdayê bêro merasîmê definkerdişî û wina vat: “Wezarîya Edaletî û zîndanî destûr da. La bi bahaneyê asayîşî nêverdayî. Tewrê cenazeye nêbî. Seba keye zî seba tepişte zî rewşêka zehmet a. Pawitişê tepişteyan keye ra û rayaumûmîye ra est o. Nê merdimî bi serran o zîndanan de yê. Kes vengê înan nêeşnaweno. Tu muracatê înan netîce nêgêno. Ma venga hîsgêrîye bi heme kesî kenê. Bi ferzkerdişê poşmanîye tepişte û merdimê înan ceza kenê. Sînorê tecrîdî zîndanan de çin o. Gelo na saete ra tepîya poşmanîya çi ferz kenê. Zîndanan de grev est o. 100 rojî ra zêde yo grev dewam keno. Ma xoverdayîşê dayîkê Nobeta Edaletî zî silam kenê. Ma venga heme kesî kenê ke hemverê tepişteyan de bi hîsin bibê. Vengê tepişteyan bieşnawê. Seba peynîkerdişê tecrîdî ganî têkoşîn bêro dayîş. Ma venga têkoşînî bi heme kesî kenê.”