Partîya Têduştîye û Demokrasîyî yê Şaran (DEM Partî) do seba zêdeyê hezar rayê merkezê Bedlîsî yê ke derbazdar nêameyî hesibnayîş, îtîraz bikera. Namzetê hemşaredarîye yê DEM Partî Nezîr Karabaş dîmenê derheqê “weçînitoxê” neqlkerde yê AKPyî ke ardbî bajar pare kerd. Nezîrî serê hesabê xo yê medyaya dijîtale de dîmenê raydayîşî bi nê çekuyan pare kerd: “Ha tîya de weçînitoxê AKP û Nezrullahî. Do şarê ma dîmenên xespkerdişê îradeyê şarî xo vîra nêkero. Qet şik çin o ke do şarê Bedlîsî alçaxîya ke ame kerdiş, nê kesê ke nîno zanayîş kam ca ra ardî û seba xespkerdişê îradeyê şarî ke neqlê bajarî ameyê kerdiş xo vîra nêkero.” 

 

Goreyê netîceyê fermî; merkezê Bedlîsî de AKP 8 hezar û 900 rayî û DEM Partî zî 8 hezar û 702 rayî girewt. Bajar de 2 hezar û 18 rayî zî derbazdar nêameyî hesibnayîş. Ame îdîakerdiş ke goreyê reqemê fermî AKP bi ferqêke bi qasî 196 rayan ser kewto. Yeno pawitiş ke DEM Partî vera rayê nêderbazdar ewro yewna reye îtîraz bikero.