Nazlican Nûjîn Yildiz

 

MERKEZÊ XEBERAN - Dimayê ke grevê vêşanîye yê zîndanan bi waştişê ‘Abdullah Ocalanî rê azadî problemê kurdî rê çareserîya sîyasî’ dîya destpêkerdiş, bi eynî waştişî merdimê tepişteyan xeylê bajaran de Nobeta Edaletî dayî destpêkerdiş. Merdimê tepişteyan vatî ke heta tecrîd peynî nêbo do têkoşînê înan dewam bikero. 

 

Rayberê PKKyî Abdullah Ocalanî ra 36 aşmî yo xebere nîna girewtiş. Tecrîdê giran yê serê Abdullah Ocalanî serê heme zîndanan de tesîr viraşt o. Zîndanan de vera şertê tecrîdê giran û semedo ke rayberê PKKyî ra xebere nîna girewtişî, dîya destpêkerdiş û 120 rojî derbas kerd. Çalakîya Nobeta Edaletî ya ke teber de dîyaye destpêkerdiş zî 8 bajaran de dewam kena. 

 

Hemleyê 10ê teşrîna verêne 

 

Heme muracatê seba pêvînayîşî yê avûkatan bi bahaneyê cezaya “disîplînî” yenê qedexekerdiş û 36 aşmî yo Rayberê PKKyî Abdullah Ocalanî ra xebere nîna girewtiş. Derheqê babete de û seba azadîya fîzîkî ya Abdullah Ocalanî bi sloganê "Abdullah Ocalanî rê azadî, problemê kurdî rê çareserîya sîyasî" 10ê Teşrîna Verêne de kampanyayêke dîya destpêkerdiş.

 

 27ê Teşrîna Peyêne: Grevê vêşanîye dîya destpêkerdiş 

 

27ê Teşrîna Peyêne de seba ke paştî bidîyo kampanyaye grevê vêşanîye dîya destpêkerdiş, dima ra merdime tepişteyan bi eynî waştişî bi sloganê ‘Seba edaletî ma tecrîdî bişiknê seba aştîye ma bibê vengê zîndanan’ dest bi çalakîya Nobeta Edeletî kerde. 

 

Tepişteyan eşkerayîyêke da û dîyar kerde ke ê sey tepişteyê PKK û PAJKî kampanyaya ‘Abdullah Ocalanî rê azadî problemê kurdî rê çareserîya sîyasî’ ke startê ci 10ê teşrîna verêne de ame dayîş pîroz û silam kenê û ame vatiş ke bi heme bîyayîşê xo do paştî bidê na kampanyaye. 

 

Dima ra nobeta edaletî dîya destpêkerdiş 

 

Dimayê grevê vêşanîye ke tepişteyan dabî destpêkerdiş, merdime tepişteyan bi eynî amancî bi sloganê “Seba edaletî ma tecrîdî bişiknê seba aştîye ma bibê vengê zîndanan” 4ê Kanûne de dest bi çalakîya Nobeta Edeletî kerdî. Nobete Amed, Edene û Mersîn de dîya destpêkerdiş. 

 

Wan û Stenbol tewr bîyî 

 

Dimayê Edene, Amed û Mersînî, merdime tepişteyan xeylê bajarê bînan de dest bi çalakîya nobeta edaletî kerd. Wan de 5ê Kanûne de dîya destpêkerdiş û 13ê Kanûne de zî Bagcilarê Stenbolî de dîya destpêkerdiş.

 

Hîrê bajarê bîn zî dest pêkerdî 

 

Dimayê Amed, Edene, Mersîn, Wan û Stenbolî 27ê Kanûne de Îzmîr de zî dîya destpêkerdiş û 7ê Çeleyî de zî Mêrdîn de dîya destpêkerdiş. 1ê Sibata 2024î de zî bajarê Êlihî de dîya destpêkerdiş. 

 

Kilîtê aştîye Îmrali yo 

 

Çalakîyê Nobeta Edaletî yê ke dimayê grevê vêşanîye bi eynî waştişî dîya destpêkerdiş bi temamî 8 bajaran de dewam keno. Merdime tepişteyan dîyar kerde ke heta Raberê PKKyî Abdullah Ocalanî ra xeber nêgêrê do nobete dewam bikerê û nobetan de tena şikitişê tecrîdî nê azadîya Abdullah Ocalanî zî yeno waştiş. Merdimê tepişteyan dîyar kerde ke kilîtê aştîye Îmrali de yo û ganî veng bidîyo nobeta edaletî.