MERKEZÊ XEBERAN - Kampa multecîyan a Şehîd Rustem Cudî (Mexmûr) 16ine Festîvala 4ê Nîsane ke hetê Raşteyê Perwerdî yena amadekerdiş bi akerdişê pêşangehî dewam kena. 

 

Bi wesîleya pîrozkerdişê 4ê Nîsane yanî rojbîyayîşê Rayberê PKKyî Abdullah Ocalanî her serre kampa multecîyan a Mexmûrî de hetê Raşteyê Perwerdî ra Festîvala Kultur û Sporî ya 4ê Nîsane yena organîzekerdiş. Festivale de ewil mabenê mekteban ê kampe de turnuvaya futbolî ya kêna û lajan yena viraştiş. Pêşangeho ke hetê endamê Atolyeya Şehîd Delîla û wendekarê mektebe Seretayî, Mîyanên û Amadekarîye ra yeno amadekerdiş, şarî rê ame pêşkêşkerdiş. 

 

Pêşangeh de tabloyê ke hetê endamê Atolyaya Şehîd Delîlaye ra, heme wendekarê mektebê mîyanên ê kampe ra ameyî viraştiş, ameyî mojnayîş û wendekarî bi şîîr, resim, resimê keyeyê herre, xeyme û xeylê tewirê bîn yê resimî tewrê pêşangehî bîyî. Kismêk pêşangehî zî seba wendekarê Merkezê Hêvî yê mektebe tutan ê wayîrê lazimîyê taybetî ame cîyakerdiş.

 

Akerdişê pêşangehî ra ver seba heme şehîdê azadîye yew deqe rêzgirewtiş ame girewtiş û dima ra qiseykerdişê akerdişî hetê endama Atolya Şehîd Delîla Şîrîn Karaye ra ameye kerdiş. 

 

16 serrî yo festîvale yena viraştiş

 

Şîrîn Karaye qiseykerdişê xo de 4ê Nîsane rojbîyayîşê Rayberê PKKyî Abdullah Ocalanî pîroz kerd û vat: “Şarê kurdî rojbîyayîşê Rayber Apoyî seba xo sey bîyayîşêk vîneno û bi nê hîs û kêfweşîye na roje pîroz kenê. Ma zî sey şarê Mexmûrî 16 serrî yo bi eynî amancî Festîvala Kultur û Sporî na roje de pîroz kenê. No 3 serrî ra zêdeyo ke tecrîdêk serê Rayber Apoyî de est o. Ci ra xebere nîna girewtiş, la no vernîya girêdayîşê ma yê bi Rayber Apoyî rê nêbeno asteng. O fikir û hîsê ma de yo.” 

 

Do pêşangeh heta 4ê Nîsane şarî rê akerde bo û do siba wextê siharî zî musabaqayê sporî yê mabenê mekteban de sahaya futbolî de bêro viraştiş.