Melek Avci

 

MÊRDÎN - Hemşaredara Nisêbînî Gulbîn Şahîn Daghane, serkewtişê şirawitişê qeyûmî pîroz kerde û vat: “Şarê Nisêbînî prosesê weçînayîşî de û şewa weçînayîşî de bi ruhê 7ê Hezîrane wayîrê weçînayîşî vejîya.”

 

Weçînayîşê herêmî yê 2024î de şero ke îqtîdarê AKP-MHPyî rayîr ra beno û rijyayîşê ekonomîya xo da dest. Bajarê Rojawanî de AKP vînîbîyayîşêk pîl ciwîya û bajarê Kurdistanî de zî şar şî serê sindoqan û qeyûm şirawit. Partîya Têduştîye û Demokrasîyî yê Şaran (DEM Partî) 80 şaredarî bi îradeyê şarî bi dest fîna. Bi sîstemê hemserekatîye reyde do heme bajarê Kurdistanî bi cinîyan reyde bêrê rayîr ra berdiş. 

 

Nê bajaran ra yew zî Mêrdîn bî. Qezayê ci Artuklu, Kerboran, Dêrik, Qoser, Şemrex, Nisêbîn do bi DEM Partîye bêrê rayîr ra berdiş. Yew bajarê ke zîhnîyetê qeyûm û polîtîkayê şerê taybetî tede serdest bî Nîsêbîn bî. Vera polîtîkayê şerî de Selahattîn Ay û Gulbîn Şahîn Daghane bîyî namzed û se ra 75,38 raye girewtî û qeyûm şirawitî. Hemşaredar Gulbîn Şahîn Daghane netîceyê weçînayîşî ercna. 

 

*Tabloya serkewtişî ya DEM Partî vejîya raşte. Nisêbînijî qerarê xo sindoqan de nîşan da. Şima serkewtişê şarî senî ercnenê? 

 

DEM Partî hem Nisêbîn û hem zî heme Kurdistanî de hema hema heme şaredarî girewt. Nika Kurdistan de şar û DEM Partî serdest ê. Prosesê peynî de heqê şarî hetê îqtîdarî ra ameyî xespkerdiş. Bi taybetî yew ci ra ekonomî bî. Na hete de rijîyayîş est bî. Şar bi girseyî wayîrê partîya ma vejîya. No reaksîyon 8ê Adare de bi rengê cinîye vejîya raşte, bi adirê Newroze dewam kerd. Şarê ma vejiya raşteyê Newroze û mesajê xo da.

 

*8ê Adare û Newroze de serkêşîya cinîyan raşte de bî û Êlih de hemverê Hîzbullahî de namzeta ma ya cinî bi ferqêke pîl ser kewt. Nika 80 şaredarî do bi hemşaredarê cinî rayîr ra berê. Şima se vanê? 

 

Ma startê 8ê Adare Êlih de da. No start hetê hişyarkerdişî de bî teşwîq. Ma Nisêbîn ra nimune bidê. Ma merkez û qezayanê bînan de endamtîya meclîsê şaredarîye de sîstemê fermuarî pê ard. Tebîî ma bi hemserekatîye dest pêkerd û nê polîtîkayî ra ma netîceyê cidî girewt. Ma cinî her raşteyî de bi hawayêkê aktîf xurt kerd. Prosesê peynî de heme raşteyan de cinî bî wayîrê vatişî. Nika Nisêbîn lîsteya encumenîye de bi sîstemê fermuarî ameyo vengkerdiş. Heme endamê ma yê meclîsî yê cinî kewtî meclîs.”

 

*Di demî pey yewbînan qeyûm ameyî tayînkerdiş. Prosesê weçînayîşî senî derbas bî? Coş senî bî? 

 

Coşê şarî zaf pîl bî. Ma qeyûm nêdî. Mudaxaleyê raşteyan zî nêkerdê. Rewşa normal de wexto ke şahîyeke çîyêk bibayêne cade mudaxale kerdêne. Dimayê qeyûman nê caardişî hîna zêde bî. Bi taybetî hemverê ciwanan de polîtîkayê teda ame rayîr ra berdiş. Şewa weçînayîşî dima ke sindoqî ameyî akerdiş ciwanan verê xo da raşteyan. Her raşteyê taxe de pîrozkerdiş est bî. Mudaxaleyê pîrozkerdişan nêkerdê. Wayîrvejîyayîş û coşêk pîl est bî. Vera nê wayîrvejîyayîşî de şarê ma vatiş nêdî.” 

 

*Goreyê dayeyê ne fermî peymeyê rayan ê Nisêbînî dîyar bî. Emser Licê ya Amedî rêza yewine de ya. Nisêbîn do rêza yewine bida Licê? Şima seba qezayê bîn ê Mêrdînî se vanê? 

 

Qezayê Kurdistanê pîya musabaqa de yê. Nisêbîn na hete de bi hawayêke cidî aver de ya. Bi Licê reyde musabaqa de ya. Ma musabaqaya têkoşînî ya. Musabaqayêk de heme merkez û qeza pîya berz benê ya. Nika netîceyê weçînayîşê ma se ra se eşkera nêbîyo. Zafaneyê zabitnameyan de rayê ma partîyê bînan rê ameyo nuştiş. Ma îtîrazê xo kerd. dimayê îtîrazan do bivejîyo raşte ke ma yan Licê rêza yewine de yê. Şarê Nisêbînî prosesê weçînayîşî de û şewa weçînayîşî de bi ruhê 7ê Hezîrane wayîrê weçînayîşî vejîya.”