Mîdye Miqted

 

HELEB - Huqûqnase Orîvan Mihemed bale ant serê tecrîdê hemverê Rayberê PKKyî Abdullah Ocalanî û vat: “Ma sey huqûqnasî venga heme rêxistinê mîyannetewî, rêxistinê heqê merdiman û mehkemayê mîyanneteweyî kenê ke bi lez têbigêrê û seba cigêrayîş û zelalkerdişê rewşe komîteyêk awan bikerê." 

 

9ê Teşrîna Verêne ya 1998î de hemverê Rayberê PKKyî Abdullah Ocalanî de komployê mîyanneteweyî dest pêkerd û 15ê Sibata 1999î de teslîmê Tirkîya ame kerdiş. Rayberê PKKyî a roje ra nata Îmrali de binê tecrîdêk giran de yeno tepiştiş. 37 aşmî yo tu xeberêke ci ra nîna girewtiş.

 

Derdeqê tecrîd û xebergirewtişî de Huqûqnase Orîvan Mihemed ajansê ma rê qisey kerd.

 

'Amanc tasfîyekerdişê şorişê kurdî yo' 

 

Orîvane qiseykerdişê xo de qala tarîxê awankerdişê dewleta tirkan kerd û vat: “Destpêkerdişê awankerdişî ra heta ewro kerdişê xo serê şaran de dewam kenê. Tarîxo sîya ke bi teda û qirkerdiş, qirkerdişê şaran, komployê vera înan, tersnayîşê sîstematîk û rayîrgirewtişî vernîya cinîya azade pirkerde yo. Kişta ci de seba ke na tedaya xo serê şaran de dewam bikera bi her tewir tecrîdê giran serê Abdullah Ocalanî de dayo fezkerdiş û heta roja ma ya ewro dewam keno." 

 

Orîvane qala amancê komployê vera Raberê PKKyî Abdullah Ocalanî kerd: "Komployo bi destê xeylê dewletanê komploger, bi serkêşîya dewleta tirkan ya îşxalkere vera Raybertî de ame kerdiş. Bi amancê çinîkerdişê nasname û kulturê kurdî, tasfîyekerdişê şorişê kurdî, şorişê zanistî, fikir û azadîye yo." 

 

'Qanûn ameyî peygoşkerdiş’ 

 

Orîvane bale ant serê caardişê teberê merdimîye yê hemverê Abdullah Ocalanî û wina vat: “Raybertî bi kefî û teberê qanûnî yeno tepiştiş. Zîndanê Îmraliyî yeno girewtiş, tecrîdêke giran serê Raybertî de yeno ferzkerdiş. Nêverdayî ke bi keye û avûkatê xo reyde pêvînayîş pê bîyaro. No zî binpaykerdişê qanûn û pêkerdişê mîyanneteweyî yo. Semedo ke ma vînenê ke heme pêkerdişê mîyanneteweyî û qanûnê mîyanneteweyî şert û pêkerdişê heqê merdiman ê ke heqê tepişteyê sîyasî mîyanê xo de hewêneno, heme mîyanê ci de qanûnê Tirkîya, heqê tepişteyê sîyasî yê mehkûmkerde, bi taybetî heqê her kesî dîyar kenê. Tepişte tewr tay aşme de reyêk bi keyeyê xo reyde ganî pêvînayîş bikerê. Sewbîna heqê pawitişî meşru û heqê her tepişteyêk est o ke bi tîmê xo yê pawitişî reyde pêvînayîş pê bîyaro. Dîyar kenê ke ganî tepişteyê sîyasî wayîrê muameleyê taybet bî. La çîyo ke ma serê zemînê pratik ê îşxalkerdişê dewleta tirkan de vînenê, heme qanûn, destûr û pêkerdişî peygoş kena."

 

'Rijîyayîşê bêvengîya heqanê merdiman’ 

 

Huqûqnase Orîvane wina dewam kerd: “Tu qanûnêk de çin o ke sîyasetmedarêke sey Abdullah Ocalanî bi no hawa bêro tepiştiş û îşkenceyê psîkolojîk ci rê bêro kerdiş. Goreyê kam ci qanûn, tepişteyê sîyasî bê bahaneyêk qanûnî seba demêke nedîyar, ne asayîş binê tecrîdêke giran de yenê tepiştiş? Kam ci qanûn de tecrîd bê zemînê huqûqî yeno ferzkerdiş? Mehkemayêke adil ke goreyê qanûn û heqanê merdiman têgêreno û paweno çin o. Na rewşe rijîyayîşê dezgehê heqê merdiman û rêxistinê mîyandewletî ya.”

 

'Seba cigêrayîşî ganî komîteyêke bêro awankerdiş’ 

 

Orîvane qiseykerdişê xo yê peyênan de vat: “Adirê azadîye û îradeyê cuye bi hezar tecrîd û bi hezar dêsan nîno şikitiş. Bi hezar hêzê mêtinger, zalim nêeşkenê îradeyê raybertî û şarê azadîwaştox bişiknê. Coka ra do heqîqet ser bikewo û azadî gur biba. Ma sey huqûqnasî venga heme rêxistinê mîyandewletî, rêxistinê heqê merdiman, mehkemayê mîyandewletî û rêxistinê merdiman kenê ke bi lezkî bikewê mîyanê têgêrayîş û komîteyêke mîyandewletî yê heqê merdiman seba cigêrayîşkerdişê raştîyan, zelalkerdişê rewşe awan bikerê. Seba ke bi keye û avûkatan reyde pêvînayîş pê bêro. Sewbîna ma seba Rayber Abdullah Ocalanî ke serê bingehê huqûqî û goreyê qanûnê mîyanneteweyî muhakemekerdişêk adilane wazenê û wazenê derheqê rewşa ci de eşkerayî bêra dayîş. Azadîya fîzîkî ya Rayber Abdullah Ocalanî wazenê."