MERKEZÊ XEBERAN - Tepişteyê sîyasî yê ke bi waştişê azadîya Abdullah Ocalanî û çareserkerdişê problemê kurdî 27ê Teşrîna Peyêne 2023ine ra  grevê vêşanîye de bî, bi wesîleya 4ê Nîsane roja dayîkbîyayîşê Abdullah Ocalanî çalakîya xo açarnayî qonaxêke newe.

 

Tepişteyê sîyasî yê zîndanê vakurê Kurdistanî û Tirkîya de çarçewaya kampanyaya mîyanneteweyî ya “Abdullah Ocalanî rê azadî, seba problemê kurdî çareserîya demokratîk” de, 27ê Teşrîna Peyêne 2023ine de dest bi grevê vêşenîya bêdem û dore kerdibî. Tepişteyan dîyar kerdibî ke eke heta 15ê Sibate roja komploya mîyanneteweyî ya hemverê Rayberê PKKyî Abdullah Ocalanî nêrê qebûlkerdiş, do çalakîya xo derbazê qonaxêke newe bikerê. 

 

Tepişteyê sîyasî dima ra 12ê sibate de bi eşkerayîyêke neql kerdî ke seba çalakîya înan tesîr  xebatê weçînayîşî nêkero, qerar dayî ke do dimayê  weçînayîşî çalakîya xo derbazê qonaxêke newe bikerê. Tepişteyê PKK û PAJKî vizêr serê nameyê Denîz Kaya de eşkerayîyêke weşan kerdî û neql kerdî ke ê seba wesîleya 4ê Nîsane Roja dayîkbîyayîşê Rayberê PKKyî Abdullah Ocalanî, çalakiya xo ya grevê veşanîye peynî kenê û çalakîya xo derbazê qonaxêke newe kenê. 

  

Tepişteyan eşkerîye de wina vat: “Ma çalakîya xo ya grevê vêşanîye ya dore bî, 4ê Nîsana 2024ine de peynî kenê, rojbîyayîşê 75ine ê Rayberê xo, lehengîya kede ya pîle bi heskerdiş û bisoz silam kenê. 4ê Nîsane ku rojbîyayîşê azad a, sere de Rayber Apo şehîdê têkoşînê azadîye, gerîlayê bi fedaî şer kenê, şarê me û şaran rê pîroz kenê. Ma wazenê neql bikerê ke ma do hemleyê xo yê ‘Azadî Rayber Apo rê, çareseriya demokratîk problemê kurdî rê’ 4ê Nîsane û dima bi sloganê 'Cuya bi Rayberê xo reyde heman şertî de' bi boykotkerdişê dadgehe, serdayîşê keye û qiseykerdişê bi telefonê bikerê.”

 

Çalakîya tepişteyanê sîyasî ya bi waştişê azadîya Abdullah Ocalanî û çareserkerdişê pronlemê ke 27ê Teşrîna Peyêne 2023ine de bi grevê vêşanîye ya bêdem û dore amebî destpêkerdiş, roja 130ine de bi qonaxêke newe, bi çalakîya boykotkerdişî pêvînayîşê serê telefonî, keye û dadgehe dewam keno.