MERKEZÊ XEBERAN - Vilakerdişê xêzeromanê bi nameyê “Azadî do ser bikewo – Bi Xet û Xêzan Cuya Abdullah Ocalanî”, Vakur û Rojhelatê Sûrîye de dest pêkerd. 

 

Yewîya Roşnvîran a Kantonê Cizîrî bi wesîleya rojbîyayîşê Rayber Abdullah Ocalanî 4ê Nîsane de Parkê Wendişî yê Qamişlo de çalakîyêk pê bîyaro. Xeylê roşnvîr û sewbîna hemserekê TEV-DEMî û xeylê kesî çalakîye de amade bî. 

 

Hemserekê TEV-DEMî Xerîb Hiso çalakîye de qisey kerd û rojbîyayîşê Rayber Abdullah Ocalanî pîroz kerd û vat: "Rayber Apo bi cuye, vindertiş û xoverdayîşê xo tesîr serê heme cuye û merdiman de kerd. Rojbîyayîşê Rayber Apo şarê kurdî, heme merdimîye, keyeyê şehîdan, şervanê azadîye û heme çalakîkeran rê pîroz bo.” 

 

Dimayê qiseykerdişî şaîr Beşîr Neweh şîîrê xo yê bi nameyê ‘Marmara’ ke tîya ra 24 serrî verê cu seba Rayber Abdullah Ocalanî nuştbî û şaîr Ebûd Mexso zî şîîrê xo yê 'Îmralî' ke 24 serrî verê cu wextê muhakemekerdişê Îmraliyî de nuştbî, wendî. 

 

Dima ra endamê Koma Botan dengbêj Yasîn Botanî deyîrê xo yê bi nameyê "Siwaro" ke serê xoverdayîşê Rayber Abdullah Ocalanî yê Îmraliyî yo, pêşkêş kerd. 

 

Sewbîna tewrbîyayoxê çalakîye park de darî ameyî ronayîş û verê fotografê Rayber Abdullah Ocalanî de findî ameyî tafînayîş û bi deyîrê hunermend Lawîn Seîd Yûsife govend ame çarnayîş. 

 

Peynîya çalakîye de xêzeromanê bi nameyê “Azadî do ser bikewo – Bi Xet û Xêzan Cuya Abdullah Ocalanî” ke derheqê cuya Rayber Abdullah Ocalanî de ameyo nuştiş ame vilakerdiş. 

 

Xêzeroman hetê nuştoxê skoçyayij Sean Michael Wilsonî ke Japonya de ciwîyeno ameyo nuştiş û karîkaturîsto kurd Keko ke Spanya de ciwîyeno xêzkarîya kitabî kerdo. Weşanxaneyê Şilêrî zî Vakur û Rojhelatê Sûrîye de seba çapî amade kerdo. 

 

Sewbîna çalakîye de vilawekê bi kurdkî û erebkî yê ke hetê Akademîya Zanistê Komelkî yê Abdullah Ocalanî ra ameyê amadekerdiş û kilmecuya Rayber Abdullah Ocalani ameyî vilakerdiş.