RIHA - Hemsereka Pêroyî ya DBPyî Çîgdem Kiliçgun Uçar ke rayîraşîyayîşê seba rojbîyayîşê Rayberê PKKyî Abdullah Ocalanî ame organîzekerdiş de qisey kerd û vat, "Rayîrşîyayîşê Azadîye dewam keno. Ewro verê ma Amara de yo û do rîyê ma azadîya Birêz Ocalanî de bo."

 

Rayberê PKKyî Abdullah Ocalan ewro 4ê nîsane de bîyo 75 serre. Rayraşîyayîşê 'Seba Azadîye Ver bi Amara' yo ke bi wesîleya rojbîyayîşê Rayberê PKKyî Abdullah Ocalanî ameyo serûberkerdene, dest pêkerd. Rayraşîyayîş hetê Kongreya Komelê Demokratîkî (KCD), Têgêrayîşê Cinîyan ê Azadan (TJA), Federasyonê Komeleyanê Huqûqî û Paştdayîşê bi Tepişte û Hukmwerdeyan ê MEDî (MED TUHAD FED), DBP û DEM Partî ra ame serûberkerdene. 

 

Xeylêk kesî seba rayraşîyayîşî taxa Alîgorî ya qezaya Pirsûsî ya Riha de ameyî pêser. Hemsereka Pêroyî ya DBPyî Çîgdeme Kiliçgun Uçar, Hemserekê MED TUHAD FED Kerem Canpolat, Vervatoxê HDKyî Cengîz Çîçek, avûkatê Buroyê Huqûqî yê Asrinî û xeylêk kesî tewrê rayraşîyayîşî bîyî Girseyî bi deyîran govende girewte. 

 

Dima ra Wekîlê DEM Partî Omer Ocalanî qisey kerd û wina vat: “Serekê ma Birêz Ocalan o. Şarê kurdî 40 serrî yo wayîrê Rayberê xo vejîyeno. Serra ci ya 75ine de ganî ma azadîya ey bîyarê ca. Seba ney tepişteyî grevê vêşanîye de yê. Ewro grev de safhayêka newîye dest pêkena. Ganî ma wayîrê nê xoverdayîşê tepişteyan vejîyê.”

 

 

‘Şarê kurdî derse da’

 

Hemsereka Pêroyî ya DBPyî Çîgdeme Kiliçgun Uçar derheqê rayraşîyayîşî de eşkerayîyêke daye û vat: “Şarê ma weçînayîşan de mesajê pîlî dayî îqtîdarî. Ancî şarê ma nêverda ke Wan de îradeyê ci bêro xespkerdene. Birêz Abdullah Ocalanî wextê Prosesê Çareserîye de vatbi ke çareserîye mumkîn a. La îqtîdarî goş nêda nê qiseyan û proses qedîna. Ewro rojbîyayîşê Birêz Ocalanî yo ke o 25 serrî yo binê tecrîdêkê giranî de yo. Seba ke Birêz Ocalan seba çareserîye rolanê xo bîyaro ca ganî azad bibo. Êyê ke meseleya kurdan de israr kenê do bin bikewê. Rayraşîyayîşê Azadîye ewro ver bi Amara do dewam bikero. Ma do seba azadîya Ocalanî têkoşînê xo rê dewam bikerê. Ma do nêverdê ke welat bi tecrîdî bêro îdarekerdene. Wa rojbîyayîşê Rayberê Şarê Kurdî fîraz bibo.'' 

 

Dimayê eşkerayîye, girse ver bi Amara kewt rayîr.