Oznûr Deger

 

RIHA - Dayîka tepişteya bi nameyê Zîlan Demîra ke 4 serrî yo bi tena sereyê xo hucre de yena tepiştiş û ganî çimanê xo ra amelîyat biba, Sevîm Demîre wina vat: “Rewşa kênaya mi xirab a. Siba eke çîyêk bêro sereyê kênaya mi do kam hesabê ci bido.” 

 

Vera tecrîdê giran ê serê Rayberê PKKyî Abdullah Ocalanî ke 36 aşmî yo ci ra tu xeberêk nîna girewtiş, tepişteyê sîyasî 27ê Teşrîna Peyêne ya 2023yî de bi waştişê ‘Abdullah Ocalanî rê azadî problemê Kurd rê çareserî’ dest bi çalakîya grevê vêşanîye kerdê û çalakî dewam kena. Tedaya serê tepişteyan her ke şino zêde bena. 

 

Bi îşkenceyî yena tepiştiş 

 

Zîlan Demîre (27) zîndanê Tîpê Syî yê Manavgatî yê Antalya de binê tecrîdê giran de yena tepiştiş. 2019î de colterê Qizileyşanî yê Dêrikî ya Mêrdînî de ameye tepişti û şirawîya zîndanê Tîpê Eyî yê Mêrdînî. Zîlane bi rêzkî zîndanê Tîpa Tyî yê Xarpêtî û zîndanê cinîyan ê Tarsûsî de menda. Tewr peynî surgunê zîndanê Tîpê Syî yê Manavgatî ameye kerdiş. No 4 serrî yo tena hucre de yena tepiştiş û ganî çimanê xo ra amelîyat biba. Dayîka aye Sevîm Demîre vat ke kênaya aye roje de çend saetan tena vejenê hewadayîşî û vat ke rewşa aye xirab a.

 

 ‘Semedo ke ti terorîsta ma nêwazenê to derman bikerê’ 

 

Sevîme dîyar kerd ke Zîlane 13 rojan nezaret de menda, îşkenceyê giran ci kerdî û wina dewam kerd: “Îşkenceyê giran bi Zîlane ameyê kerdiş. Dimayê Mêrdînî surgunê Xarpêtî ameye kerdiş. La nêweş kewte. Wedarîyaye nêweşxane. Doktor vanê ‘semedo ke ti terorîsta ez to derman nêkena’. Zîlane zî wina vejîyena. Dima ra surgunê Tarsûsî ameye kerdiş.”

 

 ‘Benê cayê hîna dûrî’ 

 

Sevîme ard ziwan ke kênaya aye semedo ke dûrîya nêeşkena şêra aye bivîna û wina vat: “Heme waştişê sewqkerdişî ameyî redkerdiş. Pîyê aye nêweş o. Ma seba dîyîşê aye wazenê bîyarê zîndanêk nizdî. La waştişname nînê qebulkerdiş. Ez serra verê cû roşan de şîya verê Zîlane. Ma wazenê bîyarê cayêk nizdî. La ê ma ra hîna dûrî benê.”

 

 ‘4 serrî yo hucre de yena tepiştiş’ 

 

Sevîme da zanayîş ke kênaya aye 4 serrî yo hucre de yena tepiştiş û 170 serrî ceza ci rê ame birnayîş. Sevîme vat ke vera ceza hema nêameyo tesdîqkerdiş bi tena sereye xo yena tepiştiş û wina peynî kerd: “Kênaya mi tena yena tepiştiş. Vera nê caardişan de xover dana. Şina nêweşxane la vanê ma yê koyî derman nêkenê. Yê koyî merdim nîyê? Wa seyyewbînanî bibo, wa zilm çinî bo ke domanê ma nêşêrê koyan. Rewşa kênaya mi xirab a. Ez wexto ke şina kişta kênaya xo û lajê xo nêverdenê ma fotograf biancî. Çîyêk bêro sereyê aye do kam hesab bido. Çimê xo ra nêweş a. La nîna dermankerdiş. Ê se bikerê zî ma do fek bawerîya xo ra nêverdî.”