Mîdye Miqted

 

HELEB - Bi wesîleya 4ê Nîsane hemwelatijê wirdî taxê Şêx Meqsûd û Eşrefîye seba Rayberê PKKyî Abdullah Ocalanî 300 darî ameyî ronayîş. Cinîyê ke tewrê çalakîya ronayîşê daran bîyî vatî ke têkoşînê înan ê seba azadkerdişê Abdullah Ocalanî do dewam bikero û vatî: "Bi 4ê Nîsane reyde şarê kurdî têkoşînê xo hîna pîl kerd." 

 

Taxa Şêx Meqsûdî ya bajarê Helebî de bi wesîleya roja 4ê Nîsane rojbîyayîşê Rayberê PKKyî Abdullah Ocalanî 300 darî cayê bi nameyê Şiqeyêfî de ameyê ronayîş. Uca ra şarê taxe bi rayîrraşîyayîşêk ke vernîya Têgêrayîşê Ciwanê Şoreşgerî ra herikîya raşteyê taxa Eşrefîye. Uca de parkê Efrînî de dest bi şahîye ame kerdiş. fotografê Rayberê PKKyî Abdullah Ocalan û pankartê "Seba Rayber Apo azadî problemê kurd rê çareserîya sîyasî" ameyî berzkerdiş. Cinîyê ke tewrê çalakîye bîyî qisey kerdî. 

 

'Rojbîyayîşê Raybertî rojbîyayîşê ma yo’ 

 

Sebah Mihemed Diloye da zanayîş ke rojbîyayîşê Rayberê PKKyî Abdullah Ocalanî rojbîyayîşê şarê kurd o û wina vat: "Seba Rayberê xo ma dar ronenê. Raybertî ma koletîya hezar serran ra şîyar kerd. seba cinîyan têkoşînêk bêmaben da. Ewro no 25 serrî yo ke Raybertî mîyanê zîndanê Îmraliyî de yo. Rojbîyayîşê Raybertî rojbîyayîşê ma yo û ma na roje bi heme dinya rê pîroz kenê û Rayberê xo rê pîroz kenê. Hêvîya ma no yo ke ma Rayberê xo mîyanê xo de bivînê. Na roje seba ma rojêke bi mana ya, çike cinî bi wesîleya Raybertî xo nas kerd û wayîrê heqê azadîya xo vejîya."

 

'Bi 4ê Nîsane şarê kurdî têkoşînê xo pîl kerd' 

 

Endama Yewîya Pawitişê Cinîye (YPJ) Sîya Jîn Tolhildane serrgêra awankerdişê YPJyî zî pîroz kerd û wina dewam kerd: “Ma 4ê Nîsane Rayber Abdullah Ocalanî, tepişteyê zîndanan û şerwanê cepheye şerî de pîroz kenê. 4ê Nîsane seba ma wayîrê manayêke pîl a. Sewbîna tîya ra 11 serrî verê cu Yewîya Pawitişê Cinîye (YPJ) awan bî. No zî bi wesîleya fikir û felsefeya Raybertî bî. Çike Raybertî rayîrê azadîye û şerkerdişê hemverê koletîye mojna ma. Ma zî awankerdişê YPJyî dîyarîyê Raybertî kerd. 4ê Nîsane seba ma rojêke zaf pîroz a. Bi na roje reyde şarê kurdî têkoşînê xo pîl kerd."

 

 'Têkoşînê ma yê seba azadkerdişê Raybertî do dewam bikero' 

 

Emîra Mihemede da zanayîş ke heta Rayberê PKKyî Abdullah Ocalanî azad bikerê do têkoşînê xo dewam bikerê û wina vat: "Ma rojbîyayîşê Raybertî, Raybertî rê pîroz kenê û cinîyê dinya rê pîroz kenê. Sewbîna na roje seba ma cinîyan û bi taybetî seba cinîya kurde rojêke wayîrê manayêk zaf pîl a. Ma do her raşteyî de bê, têkoşînê xo dewam bikerê, heta ke ma Rayberê xo azad bikerê."