Nazlican Nujîn Yildiz

 

ÎZMÎR - Pîrebokê Kampusî Eda Erdogane bale ant serê rêxistinbîyayîşê wendekaran ê vera heme tedayan û vat ke bi taybetî wendekarê cinî vera nê polîtîkayan de wayîrê hişmendiîyê û vera nê de reyna zî kişta yewbînan de ca gênê. 

 

Problemê wendekaranê unîversîteye her serre hîna giran beno. Serra verêne Aydin de Yurdê KYKyî yê Guzelhîsarî de wendekara unîversîte Zeren Ertaşe netîceyê kewtişê asansorî de dinyaya xo bedelnaye û problemê wendekaran bi nê qewimîyayîşî reyde hîna zelal ame dîyîş. Dimayê Zerene wendekaran xeylê yurdan de probleman ardî ziwan. Hetê îqtîdarî ra seba wendekaran tu alternatîf nîno dayîş û bi taybetî zî hemverê wendekarê rêxistinkerde de teda zêde bena. Heto bîn de wendekarî problemê ekonomîye û fikarê ameyoxî vera şinê qeraxê întîxarî. Rojanê verênan de wendekara Beşê psîkolojîye ya Unîversîteya Bîlkentî Yelîz Akturke bi hawayêkê şikin dinyaya xo bedelnaye. Ame îdiakerdiş ke Yelîze întîxar kerda. Wendekran dîyar kerd ke problemê înan her ke şino giran beno û vatî ke ganî mergê bi şikin yê Yelîze bêro roşnkerdiş. 

 

Pîrebokê Kampusî ra Eda Erdogane qala teda û problemê ke ciwîyenê kerd û vat ke ganî wendekarî vera nê probleman de xo rêxistin bikerê û hedefê înan yê tewr pîl zî bedilnayîşê rejîmî yo.

 

Alternatîfê wendekaran çin o

 

Edaye ard ziwan ke aye yurdê KYKyî de manena û odeya înan de 6 ya zî 8 kes manenê û raşte xeylê tengo. Edaye wina vat: “Werdê înan baş nîyê. Mîyanê ci de bihok vejîyenê. Porsîyon zaf şenik o. Ma problemê winasîyan ciwîyenê. Ma cinî yurdan de hîna zêde teda ciwîyenê. Yurdê KYKyî û tarîkatî, sewbîna alternatîf seba wendekaran çin o. Netîceyê nê çîyan de teda bi wendekaran kenê û verê xo danê întîxaran.” 

 

‘Çalakîyê Zeren Ertaşe de îradeyêk pîl ame mojnayîş’ 

 

Edaye qiseykerdişê xo wina dewam kerd: “Dimayê mergê Zeren Ertaşe wendekaran çalakî pê ard û îradeyêk pîl ame mojnayîş. Netîceyê nê çalakîyan de tay destkewtişî ameyî destfînayîş. Seba wendekarê ke yurdê KYKyî de mendêne tay destkewtiş ameyê destfînayîş. Wendekaran bi nê çalakîyan xo rêxistin kerd û vatî ke xeylê çî bedilîyayo. Wendekaran vera tedaya îqtîdarî de û problemê ke kampusan de ciwîyenê de rêxistinbîyayîş tercîh kerdê. Wendekaran emser werdo bê pere taleb kenê. Vera nê de tehqîqat ame akerdiş. La wendekarî vera nê de sere çewt nêkerd û têkoşîn kenê.” 

 

Wendekarê cinî polîtîkayê îqtîdarîyê camêrd dîyê 

 

Edaye qiseykerdişê xo yê peyênan de dîyar kerd ke wendekarê cinî caardişê îqtîdarê camêrdî ê hemverê înan dîyê û vera nê caardişan de bîyê yew û wina peynî kerd: “Wendekaran bi taybetî zî yê cinî vatî ‘êdî bes o’. Vera nê polîtîkayan de rêxistinbîyayîş tercîh kerdê. Îradeyêk pîl vera tedaye de ame mojnayîş. Hedefê ma yê tewr pîl vera tedaye de têkoşîno. Hedefê ma bedilnayîşê nê rejîmî yo. Ma wazenê vera nê rejîmî de dinyaya xo awan bikerê.”