Pelşîn Çetînkaya

 

SÊRT - Cinîyê Sêrtî derheqê tecrîdê serê Rayberê PKKyî Abdullah Ocalan û polîtîkayê şerê taybetî de qisey kerd û vatî: “Bê Apoyî do şer bibo. Wa aştî pê bêro, no zilm wa peynî bibo.” 

 

Tecrîdê giran ê serê Rayberê PKKyî Abdullah Ocalanî her dke şino giran beno. Ne keye û ne zî avûkatan reyde pêvînayîş pê nîno. Tecrîdo giran sere de zîndanan ser de serê heme komelî de kerdo. Yew parçeyê tecrîdî polîtîkayê şerê taybet o. Cinîyê Sêrtî derheqê tesîrê nê caardişan ê serê cuye de qisey kerdê.

 

‘Merdim teda vera şino teberê welatî’ 

 

Cinîya bi nameyê Emîne Polate dîyar kerd ke tedaya dewlete vera kurdî mecbur manenê şêrê teberê welatî û wina vat: “Dewlete neheqî bi ma kena. Ma ra aciz bena. Ma edalet û aştî wazenê. Ma nêwazenê kes zirar bivîno. Serê ciwan û şarê ma de teda pê yeno. Edalet çin o. Ya kişenê, ya tepiştenê û ya zî teda kenê. Erdogan seba şarê kurdî tu çîyêk nêkerdo.”

 

‘Ma seyyewbînanî û edalet wazenê’ 

 

Emîne wina dewam kerd: “Polîtîkayê şerî tesîrêk pîl serê Sêrtî de kerdo. Ez bajarê xo de rehet nîya. Seke ez zîndan de ba. Polîs mi û tutanê mi taqîp kenê. Nêverdenê ma rehet biciwî. Şarê kurdî nêwazeno kes bimiro. Ma wazenê tutê ma rehet bû. Tutê mi tedaye vera şîyê teberê welat.”

 

‘Apo çinî bo do şer bibo’ 

 

Cinîya bi nameyê Gulîsan Erole zî da zanayîş ke hemverê şarê kurdî de zilm pê yeno û wina vat: “Ma aştî wazenê la ê şîdet bi ma kenê. Di merdimê mi zîndan de bi îşkence ameyî qetilkerdiş. Ma bikerê zîndanan zî ma fek têkoşînê xo ra nêverdenê. Her ca de teda bi ma kenê. Ma nêeşkenê bi rehetî ziwanê xo qisey bikerê. Ma govende çarnenê polîs hêriş kenê. Seba ma bitepişî polîs verê berî de maneno. Abdullah Ocalan binê tecrîdêk giran de yo. Ganî bi lezkî tecrîd bêro wedaritiş. Eke Apo çinî bo do şer bibo. Ma aştî wazenê.” 

 

‘Ez wazena ziwanê xo qisey bikera’ 

 

Hevîdar Kiraçe zî wina qisey kerd: “Tirk ma ra aciz ê. Dewleta tirkan zîndanan de îşkence bi tepişteyan kena. Zilm bi tutanê ma kena. Sereyê şarê kurdî berz o. Ma eslê xo vînî nêkerdo. Ma aştî û asayîş wazenê. Ma wazenê Apo serbest bêro verdayîş. Wexto ke bêro verdayîş do dinya hîna weş biba.”