Rojda Aydin – Zelal Tunç

 

WAN - Hemşaredara Bajarê Pîlî ya Wanî Neslîhan Şedale dîyar kerd ke Wan de xoverdayîş ser kewt û vat: “No şar her çî yî heq keno. Ma do bi şew û roje bixebetîyê ke Wan biresnê ercê ke heq keno.”

 

Partîya Têduştîye û Demokrasîyî yê Şaran (DEM Partî) ke weçînayîşê herêmî yê 31ê Adare de Wan de her 14 şaredarî dest fîna, ser kewt. La îqtîdar xîret kerd ke îradeyê şarî xesp bikero. Vera xîretkerdişê xespkerdişê îradeyê şarî de xoverdayîşêk tarîxî ame mojnayîş. Vera xoverdayîşî, mecbur mend ke îqtîdar tepîya game bierzo. Hemşaredarê Bajarê Pîlî Neslîhan Şedal û Abdullah Zeydanî vizêr tewrê endamê Meclîsê Dayîkê Aştîye, merdime tepişteyan û cinîyan reyde mazbataya xo girewtî. Dima ra heme pîya derbazê awanîya şaredarîye ya ke 8 serrî yo bi îşxalkerdişê qeyûman ameyêne rayîr ra berdiş. Tîya de zî hemşaredarî bi çepik, tilîlî û vilikan ameyî pêşwazîkerdiş. 

 

‘Xoverdayîş ser kewt’ 

 

Hemşaredare Neslîhan Şedala ke tîya de raştê eleqeyêk pîl ameye ajansê ma rê qalê hîsanê xo kerd û vat: “Ma pîya prosesêk ke serê nameyê Wanî xoverdayîşêk pîl açarîya serkewtişî derbaz kerd. Bi destfînayîşê 14 ra 14î, tarîxêk efsanewî dinya de ame nuştiş. Pêroyê prosesê weçînayîşê herêmî de ma zanayêne ke do xebatê ma biresê netîceyêke winasî. Heme pêvînayîşê ke ma şîyî de no atmosfer dîyar bî. Ma bi weçînayîş heme şaredarîyanê xo dest fîna û bi serkewtişêk pîl tepîya girewt.”

 

‘Bi qerarê YSKyî reyna açarîya xoverdayîşî’ 

 

Neslîhane ard ziwan ke dimayê serkewtişê înan YSKyî xîret kerdo ke heqanê hemşaredar Abdullah Zeydanî tepîya bigêro û wina dewam kerd: “Dimayê nê qerarî, seke ma her tim vanê, serkewtişê 14î ra 14î bi qerarê YSKyî, bi cinî, ciwan, heme dînamîkê komelî reyde açarîya rewşêka xoverdayîş û têkoşînî. Şar vera qerarê YSKyî de di rojan heqê xo yê xoverdayîşî şuxilna û reaksîyon mojna. YSK dimayê xoverdayîşî qerar newe ra verê çiman ra derbaz kerd. Ganî bêro vatiş ke no zî hêvîyê açarnayîşê nê komelî seba awankerdişê demokratîk, têduştî, azadîwaştiş û huqûqî xurt keno.”

 

‘Ma na rewşe sey têkoşînêke newî biname kenê’ 

 

Neslîhane da zanayîş ke têkoşînê înan sey têduştîye, edalet, azadî û cuya demokratîke biname kena û wina vat: “Ganî bêro watiş ke hem prosesê rayîrberîyê herêmî de û hem zî wexto ke ma nê têkoşînî rayîr ra bene de, amancê ma yê yewine no yo ke ma têkoşînê xo bi perspektîfê cuya demokratîk, ekololîk, azadîya cinîye yê paradigmaya rayîrberîyê xo yê herêmî têbigêrê. Ma 14î ra 14 kerd û na rey weçînayîşê herêmî de ma 14 şaredarîyanê xo dest fîna. Bi nê têkoşînî hema şaredarîyê xo ma dest fîna û ma na rewşe sey 15î ra 15 biname kenê. Ma 14 nê sey 15 biname kenê.”

 

‘Ma do bajar bi komelî reyde rayîr ra berê’ 

 

Neslîhane dîyar kerd ke têkoşîn tena Wan de nîyo û wina dewam kerd: “Têkoşîn mesajê hîrakerdişê hevîya awankerdişê komelêk têduştîye, adil û azad da do tesîrê ameyoxî ser de zî bikero. Coka ra ma bi hawayêkê zêde aver kewtê. Heme kesê ke hetkarîya ma kerdê û ma resnayê nê destkewtişî; partîyê sîyasî, rêxistinê sivîl, ciwan, cinî, dayik û heme dînamîkê komelî rê ma sipas kenê. Ma dîyar kerdbî ke ma do bajarê xo bi dînamîkê komelî reyde rayîr ra berê.”

 

‘Çi destê ma ra bêro ma do bikerê’ 

 

Neslîhane qiseykerdişê xo yê peyênan de dîyar kerd ke qeyûmê ke demêk dergo tu problemêk çareser nêkerdê, problemê dînamîkê komelî rê nêbîyê çareser. Neslîhane wina qiseykerdişê xo peynî kerd: “Ma vanê, vera nê polîtîkayê ke lazimîyê komelî pê çin o, ma do heme probleman bivejê vernîya xo, ma do bajarê xo newe ra bikerê bajarêk cuye, ma do nê bajarî bikerê bajarêk ekolojîk, cinî, kulturî, bajarêk bê asteng, bajarêk kulturî û bajarêk geştîyarîye. Wext ameyo ke ma bi şew û roje bixebetîyê. No şar zêde heq keno. Ma zî na babete de soz danê. Ma reyna vanê ke seba Wan bireso erco ke heq keno, ma do bi şew û roje bixebetîyê.”