Pelşîn Çetînkaya

 

ÊLIH - Hemşaredara Êlihî ya DEM Partî Gulîstan Sonuka ke vera zîhnîyeto ke cinî çinî hesibnayêne bî hemşaredare vat: “Ma do tîfaqê xo yê rêxistinkerde, têkoşînê azadîya cinîye biresnê ameyoxî.” 

 

Weçînayîşê herêmî ke emser pê ame de reyna bi têkoşînê vera dewlete û camêrdî xebatî ameyî kerdiş. Êlih de vera zîhnîyeto ke nasname û destkewtişê cinîyan çinî hesibneno de Partîya Têduştîye û Demokrasîyî yê Şaran (DEM Partî) destpêkerdişê amadekarîyê weçînayîşî de têkoşînê xo da. Êlihê de netîceyê xebatan de DEM Partî se ra 64,53 raye girewt û weçînayîş de ser kewt. Hemşaredare Gulîstan Sonuka ke ameye weçînayîş qala prosesê weçînayîş û ameyoxî kerd.

 

‘Ma vera namzetê dişmenê cinîye de têkoşîn kerd’ 

 

Gulîstane da zanayîş ke Êlih de prosesê weçînayîşî yê normal nêame rayîr ra berdiş û yewine rey demêk wina ke tarîxê azadîya cinîye de hende hêriş pê ameyî, ame ciwîyayîş. Gulîstanê vat: “Demêk winasî ke tîfaqê camêrdî xo rêxistin kerd û hêrişê ma kerd de ma şîyê weçînayîş. Eke têkoşînê cinîye yê hende rêxistinkerde çinîbayêne ma do ser nêkewtêne. Coka ra sîstem demêk winasî de sîstemê hemserekatîye vist munaqaşa. Vatî ‘cinî nêeşkena bikera, cinî do rayan bifîna’. Hêzê cinîye vistî munaqaşa mîyan. Sewbîna hêzê hemverê ma tena namzedêk nêbî. Hêzê vera ma camêrdo ke heme îmkanê sîstemî şuxilneno bî. Nasnameyê cinîye vera nameye ma zî nêardî ziwan.”

 

Nizdîbîyayîşê cînsîyetperestî 

 

Gulîstane dîyar kerd ke vera zîhnîyeto ke cinîyan qebûl nêkeno, keno planê peynî û goreyê xo şekil keno, têkoşîn kerda û wina vat: “Ma eynî zîhnîyet 2011î de Rojawan de çal kerd. Zîhnîyeto ke şer de hetê şervanê cinîye ra ame kiştiş, ewro reyna Êlih de binê nameyê partîye sîyasî de vejîya raşte. Ê zanayê do hemverê ma de têk şêrê la zîhnîyetêk winasî yê sey ‘Têk şêro zî qet nêbo wa hemverê camêrdan de têk şêro’ est bî. Prosesê weçînayîşî de nizdîbîyayîşê cînsîyetperest, vatişê cînsîyetperest nîşan dayî. Xeylê roportajê xo de vatî ‘Ma qezenc bikerê ma tewrê çarşefê kesî ’ nêbenê. Coka ra zî ma prosesêk normal derbaz nêkerd. Ma vera nê zîhnîyetî de têkoşîn kerd. Ma vera zîhnîyeto ke nêwazeno cinî qebûl bikera û mîyanê çar dêsî de bipelçiqna de têkoşîn kerd. Ma ser kewtê.”

 

‘Ma do rayîrberîyê azadiwaştox ê cinîyan awan bikerê’ 

 

Gulîstane dewamê qiseykerdişê xo de nê çîyana ard ziwan: “Ma bi ferqêk pîl şaredarîye girewt. Ma do rayîrberîyê azadîwaştox ê cinîyan awan bikerê. Her roje bi cinîyan şîdet yeno kerdiş. La serê nê esasî ma do seba bedilnayîşê nê sîstem û sîyasetî herême ra dest pêbikerê. Ma do rayîrberîyê azadiwaştoxî yê cinîyan awan bikerê. Ma do şaredarîye de heme yewînîyan de îstîhdamê cinîye pê bîyarê. Ma do destkewtişê ke ameyî xespkerdiş newe ra bigîrê. Ma do nê çîyan bi hişmendîya cinîye bikerê. Ma do cinîyan bidê dîyîş û projeyê xo bikerê cuye.”

 

‘Jin jiyan azadî bî hêvî’ 

 

Gulîstane qiseykerdişê xo yê peyênan de bale ant serê sloganê ‘jin jiyan azadî’ û nê çîyan vat: “Sloganê 'Jin jiyan azadî' heme dinya rê bî. Ma do felsefeya jin jiyan azadî her ca de vila bikerê. Ma vera tîfaqê camêrdî yê rêxistinkerde de têkoşînê azadîya cinîye biresnê ameyoxî.”