MERKEZÊ XEBERAN -  Înîsîyatîfê Şarî yê Vakur û Rojhelatê Sûrîye pê hesna ke seba azadîya Rayberê PKKyî Abdullah Ocalanî 3 mîlyon û 669 hezar û 90 îmza arê dayî.

 

Înîsîyatîfê Şarî yê Herêma Vakur û Rojhelatê Sûrîye 9ê Sibate bi eşkerayîyêke ke bajarê Qamişlo de dabî, kampanyaya komkerdişê îmzeyan dabî destpêkerdiş. Çarçeweya kampanyaye de herêma Vakur û Rojhelatê Sûrîye, Heleb, Şam, Hema, Humis, Laziqiye, Sweyda, Quneytera, Selamiye û Tertûsê îmze ameyî komkerdiş.

 

Înîsîyatîfê Şarî yê Herêma Vakur û Rojhelatê Sûrîye ewro bi eşkerayîyêke netîceyê kampanyaye eşkera kerd. Eşkerayî Stadyumê Şehîdê 12ê Adare yê Qamişlo de ame dayîş û hetê endamê însîyatîfê Aynur Paşaye ra ame wendiş. 

 

Eşkerayîye de ame vîrvistiş ke kampanyaya komkerdişê îmzayan ê seba azadîya fîzîkî ya Rayberê PKKyî Abdullah Ocalanî 9ê Sibata verên de dest pêkerd û 4ê Nîsane rojbîyayîşê Abdullah Ocalanî de peynî bî. 

 

Eşkerayîye de ame dîyarkerdiş ke şarê Sûrîye bi heme netewe, mezheb û beşê ke rojbîyayîşê Abdullah Ocalanî pîroz kenê û bi îmzayê ke dayî, mesaj dayî temamê hêzê komploger. Sewbîna ame vatiş ke no mesaj eynî wextî de peymeyê heskerdiş, paştîdayîş, bawerîya bi felsefeya Abdullah Ocalanî û israrê şarî yê seba caardişê azadîya Abdullah Ocalanî mojneno. 

 

Dewamê eşkerayîye de ame vatiş ke kampanyaye herêmê Vakur û Rojhelatê Sûrîye de bi hawayêkê hîra dest pêkerda û vilayê bajarê bîn yê sey Şam, Heleb, Selemiyê, Humis, Hema, Siwêda, Laziqiyê û Quneytîra bîye. Ame zanayîş ke hîrabîyayîşê kampanyaye peymeyê girêdayîşê temamê, netewe, mezheb û beşê komelî yê bi fikr û felsefeya Abdullah Ocalanî îsbat keno û wina vat: “Felsefeya Rayber Abdullah Ocalanî, pêrodayîşê Sûrîye zî mîyan de temamê dewa û problemê girêyo kore yê Rojhelatê Mîyanênî rê zemînê çareserîye yo.” 

 

Eşkerayîye de wina ame vatiş: “Semedo ke bawerîya ma bi rolê muhîmîya Konseyê Yewîya Ewropa est a, rêxistinê mîyanneteweyî yê heqê merdiman ra ma çareserkerdişê dewaya Rayber Ocalan û caardişê azadîya ci ya fîzîkî wazenê û ma wazenê ke rolê xo aktîf bikerê. Wa îrade û waştişê heme şaranê ke bi dewaya ci ra bawer kenê, verê çiman de bigîrê. 

 

Netîceyê komkerdişê îmzeyan wina yo: 

 

Minbic: 711,180 

 

Reqa: 701,845 

 

Qamişlo: 625,343 

 

Hesekê: 603,800 

 

Dêrezor: 337,70 

 

Tebqa: 281,332 

 

Firat: 134,570 

 

Heleb: 103,857 

 

Efrîn û Şehba: 51,212 

 

Zereyê Sûrîye: Şam, Heleb, Laziqiye, Suweyda, Quneytera, Selamiye, Tertûs, Hama, Hums: 6,243 

 

Koçberê Kurdî yê Lubnanî: 12.000 

 

Hêzê Pawitişê Komelî: 100.000 

 

Hûmara pêroyî ya îmzayê kampanyaye: 3 669 090

 

Peynîya eşkerayîye de sipasîya her kesê ke tewrê na  kampanyaye bîyî û îmze dayî ame kerdiş û wina ame vatiş: “Ma heskerdiş û sipasîyê xo pêşkêşê şarê xo yê bi netewe, dîn û mezhebê xo yê cîya kenê seba pîrozbayîya biheybet bi rojbîyayîşê Rayber Ocalanî û bi na wesîleye dewambîyayîşê kampanyaye heta azadîya Rayber Ocalanî qetî bikerê. Sewbîna ma kar kenê ke ma do komîteyêk awan bikerê ke nê netîceyan biresnê Konseya Yewîya Ewropayî û heme rêxistin û sazgehê heqê merdiman ê berpisîyarî yê mîyanneteweyî.”