QERS - Hemşaredare Ulker Ozadîktî ya DEM Partîye ke weçînayîşê 31ê Adare de şaredarî bi dest fîna wina vat: “Bi destkewtişê xo ma AKP tar û mar kerd û ampulê înan teqîyayî.” 

 

Qezaya Têkorî ya Qersî de weçînayîşê 31ê Adare de DEM Partî se ra 27,63 raye girewt û şaredarî bi dest fîna. Ulker Ozadîktî û Adem Oymanî sey hemşaredar ameyî weçînayîş. Ulkere û Ademî 3yê Nîsane de mazbatayê xo girewtî. 

 

Hemşaredara Têkorî Ulker Ozadîktîye prosesê weçînayîş û netîceyê weçînayîşî ajansê ma rê ercnaye.

 

 ‘Tu kesêke ke bi cinîyan reyde empatî bikero çin o’ 

 

Ulkere da zanayîş ke hirê aşmî yo xebatê weçînayîşî rayîr ra benê û wina vat: “Têkor qezayêke tarîxî ya û xeylê bedelî daya. Xebatê weçînayîşî de ma dew bi dewe, keye bi keye gêrayî. Paştîdayîşê şarî zaf baş bî. Cinîyan eleqeyêke pîl mojna. Coşêk pîl est bî. Heta nika xeylê partîyî xebatê weçînayîşî rayîr ra berd la xêrcê DEM Partî tu kes cinî nêdî. Tu kesêke ke bi cinîyan reyde empatî bikero çin o.” 

 

 ‘Şar bi ked û xîretkerdişê xo ser kewt’ 

 

Ulkere ard ziwan ke pîrozkerdişê 8ê Adare de zî û weçînayîşan de zî ma kombîyayîşê xurt pê ardî. Cinî tewr bîyê. Heta nika cinî nêşînê tu partîyêke. La bi ameyîşê ma reyde potansîyelê cinîyan vejîya raşte. Ganî ma serê problemê cinîyan de vinderê. Ganî xîret bêro kerdiş ke cinî tewrê kombîyayîşan bibê. Ganî ma bi çareserîye nizdîyê înan bibê û probleman goşdarî bikerê. Çi heyfo ke Têkor de cinî zaf tepîya kewtê. Têkor cayêk muhîm o. Ma bi paştîdayîşê şarî dest fîna. Şar bi ked û xîretê xo ser kewt.” 

 

Cinîyê Têkorî: Ganî ma hemşaredarê xo tena nêverdê 

 

Ulkere bale ant serê wayîrvejîyayîşê şarî û nê çîyan vat: “Hemverê DEM Partîye de 6-7 partîyê sîyasî est bî û xeylê DEM Partîye ra tersayêne. Vera heme zehmetîyan nizdîbîyayîşê şarî zaf pozîtîf bî. Ma serkewtiş pawitêne. Ma nê atmosferî dî. Ma xîretê raqîbanê xo veng vet. Cinî ameyêne partî vatêne ma hemşaredarê xo tena nêverdenê. Taxan de ameyêne têkişt. Na rewşe ma zaf kêfweş kerdêne.”

 

 ‘Ma do hesab bipersê’ 

 

Ulkere dewamê qiseykerdişê xo de vat: “Şaredarî 5 serrî bî destê AKPyî de bî. Ma ser kewtê. Ma nika baş nêzanê deynê şaredarîye çiqas o. Ganî ma înan tespit bikerê. Ma do dokumanan bi avûkatanê xo reyde berê noter û dima ra şaredarîya xo ser de daliqnê. Wexto ke AKPyî şaredarî girewt 500 mîlyar pere est bî. No pere çi rê ameyo xerckerdiş ma do bipersê. Bi şarê xo reyde zî pare bikerê." 

 

Çîyê ke ganî bikerê 

 

Ulkere qala xebatê ke do bikerê zî kerd û wina vat: “Ma do ewil problemê eşteyî çareser bikerê. Stargehê kutikan çin o. Ma do çareser bikerê. Wendekarî problemê serwîsî ciwîyenê. Ma do bi projeyê wayê û birayî yê şaredarîye çareser bikerê. Seba ke ciwanî koçê bajarê bînan nêkerê ma do fabrîqeya şit, tekstîlî awan bikerê. Ganî êdî bedilnayîş bibo. Ma do meclîsê cinî û taxan awan bikerê. Ma do qezaye bi şarî reyde rayîr ra berê. Ma do fikre şarî bigîrê. Bi destkewtişê ma AKP tar û mar bî. Ampulê înan teqîyayî. Ma ra ver wesayîtêke mercîye yê şaredarî est bî. Ma her tim dîyêne. Wesayît parçe kerdê û ronayê verê şaredarî. Ma zî vanê ke ma do heme texrîbatan raşte ra wedarnê û şarî rê xizmet bikerê.”