Pelşîn Çetînkaya

 

SÊRT - Hatîce Yildiza 75 serrî bi bahaneyê tepişteyan rê pere şirawita ameye tepiştiş. Cinîyan reaksîyon mojna na rewşe û dîyar kerde ke ê bêhuqûqî qebûl nêkenê û kişta Hatîce de yê. 

 

Polîtîkayê tecrîdî yê hemverê tepişteyan, açarîyayo metodê îşkenceyî yê serê merdimê tepişteyan. Bi taybetî seba tepişteyan tena biverdê, demê peyênan de kesê ke tepişteyan rê pere şirawenê yenê tepiştiş û tecrîdî hîna giran kenê. Esenyurtê Stenbolî de cinîya bi nameyê Hatîce Yildiza 75 serrî bi bahaneyê kênaya xo û embazê aye yê koxuşî rê pere şirawita bi îdîayê ‘rêxistine rê fînansmanî peyda kena’ dewa ameye akerdiş û dimayê 3 serran 4 serrî û 2 aşmî ceza ci rê ameye birnayîş. Dima ke qerar îstînaf de ame tesdîqkerdiş 22yê Adare de Hatîce ameye tepiştiş û berdê zîndanê cinîyan ê Bakirkoyî. Cinîyê Sêrtî seba Hatîceye veng kerdî.

 

‘Tepiştişê Hatîceye zilm o’ 

 

Temsîlkara Komeleya Hetkarîya bi Keyeyê Tepişteyan û Hukmweran (TUAY-DER) Aslihan Çeprake da zanayîş ke tepiştişê Hatîceye heqaret o û wina vat: “Ma çîyê ke bi Hatîce Yildize ameyê kerdiş qebûl nêkenê û şermezar kenê. No zilm o. Sewbîna kurdan rê heqaret yeno kerdiş. Kam bibo do kênaya xo rê pere bişirawo. Çîyo ke tîya de ameyo kerdiş heqaretêke pîl o. Ma kişta dayika Hatîce de yê.” 

 

‘Tepişteyan rê şirawitişê pere sûc nîyo’ 

 

Halîme Guçluye zî dîyar kerd ke ê binê tedaya dewlete de yê û zilmê serê şarê kurdî nîno qebûlkerdiş. Halîme nê çîyan vat: “Ma qerarê tepiştişê Hatîce qebûl nêkenê. Tebîî qet şik çin o ke ma do tutanê xo rê pere bişirawê. No sûc nîyo. Ma wayîrê înan nêvejîyê do kam wayîrê înan vejîyo? Qey aye çira tepişte ya? Tutê mi zî hîrê serrî tepişte mend. Bi tena sereyê xo hucre de ya. Semedo ke kurdî bî û bi ziwanê xo qisey kerd ameye tepiştiş. Ma heqanê xo wazenê. Tepişteyan rê pere şirawitiş vera kes nêeşkeno sûcdar bêro dîyîş. Na rewşe nîna qebûlkerdiş.”

 

‘Dewlete zûrî ya!’ 

 

Dayika Aştîye Vetha Kaçare zî reaksîyon vera tepiştişê Hatîceye mojna û wina ercnayîş kerd: “Ma pey Hatîce de yê. Aye zî sey ma dayikêk a. Dewlete ne heqet û zûrî ya. Dewlete hem yê teberî rê û hem zî yê zerreyî rê zilm kena. Tepişteyê ma dest bi çalakîyan kerdê. Ciwanan, tutan, kal û pîran kenê zîndanan. No raşt nîyo. Ganî çareyêke bêro dîyîş. Ma aştî wazenê.”

 

‘Semedo ke ma kurd ê ma yenê sûcdarkerdiş’ 

 

Dayika Aştiye Kumru Kaçare zî da zanayîş ke tepişteyî têşan û vêşan yenê verdayîş û wina dewam kerd: “Tutanê ma tepişenê. Ma pere tutanê xo rê şirawenê sûc yeno dîyîş. Ma mecburê tutanê xo rê pere bişirawê. Ma nêşirawê do kam bişirawo? Dewa ma ameye vengkerdiş. Ma tepişnenê. Ma derdê nasname û herra xo de yê. Ma nasnameyê xo pawenê. Ma na rewşe qebûl nêkenê. Semedo ke ma kurd ê, ma yenê sûcdarkerdiş.”