AMED - Cinîyê Amedî, roşan ra ver seba amadekarîyan temam bikerê vejîyayê girewtişê kelepulan û dîyar kenê ke krîzê tesîrêk pîl serê înan de kerdo. Cinîyan vat ke goreyê serranê verênan her çî bîyo vay û îdare zaf zehmet bîyo û merdim nêeşkeno nan bigîro. 

 

Roşanê Remezanî rê tena saetî mendî. Siba Kurdistan û Tirkîya de roşan yeno pîrozkerdiş û her kes amadekarî mîyan de yo. La enflasyono berz vera û zemê ke yenê kerdiş vera hemwelatijî destveng agêrenê keyeyê xo. Cinî nêeşkenê tutanê xo rê çîyêk bigîrê û werdê seba roşanî virazê. 

 

‘Ma xîret kenê ke çîyê ercan bigîrê’ 

 

Nezahat Yilmaze da zanayîş ke her çî bîyo vay û coka ra nêeşkena çîyêk bigîra û vat: “Ma market bi market gêrenê ke çîyêk ercan bivînê. Pere çin o, kar çin o. Ma zehmetîyan ancenê. Ma nêeşkenê goşt bigîrê. Wexto ke goşt çinî bo çîyêk zî nîno viraştiş. Ma nêeşkenê sebze zî bigîrê. Ma xîret kenê ke çîyê ercan bigîrê.”

 

‘Ma reyna zî nêeşkenê temam bikerê’ 

 

Hemwelatija ke nêwaşte nameyê xo bida wina vat: “Ma nêeşkenê tutanê xo rê çîyêk bigîrê. Ma nêeşkenê şêranî bigîrê. Lazimîyê ewilîn nînê girewtiş. Tutê ma her çî wazenê. Ma wazenê lazimîyê înan temam bibo la ma xo rê tu çîyêk nêgînê. Ancî zî ma nêeşkenê temam bikerê.”

 

‘Ma nêeşkenê tutan rê kincan bigîrê’ 

 

Emîne Kuzhane zi wina qisey kerd: “Goreyê serranê verênan ma zaf zehmetîyan ancenê. Ma nêeşkenê herînayîşê roşanî bikerê. Her çî bîyo vay. Ma şekir girewt, çorek viraşt. Ma tutan rê kincan girewt. La ma zehmetî ancenê. Çar tutê mi estê. Ma kîra de yê. Îdare zaf zehmet o. Ma prosesêk zehmetin ra derbaz benê.” 

 

‘Ma zehmetî ancenê’ 

 

Îlayda Bulute zî amadekarîyê roşane wina ercna: “Amadekarîyê roşanî yeno kerdiş. Keye yeno pakkerdiş. Kincî yenê girewtiş. Çorekî yenê viraştiş. Ma şekir, şîranî û şimitiş girewt. Her çî vay o. Ma zehmetî ancenê.” 

 

‘Merdimî vêşan ê’ 

 

Selma Haymaye zî wina qisey kerd: “Her çî vaye yo. Ma nêeşkenê çîyêk bigîrê. Kes nêeşkeno çîyêk bigîro. Merdimî vêşan ê. Merdim nêeşkeno îdareyê xo bikero. Merdim nêeşkeno nan bigîro. Pereyê nanî nêvîneno.”

 

‘Kes nêeşkeno çîyêk bigîro’ 

 

Cinîya bi nameyê Aysel Ardaye zî da zanayîş ke bi meaşê teqawîtî îdare kena û coka ra nêeşkena amadekarîyê roşanî bikera û wina peynî kerd: “Meaşê ma kêm o. Mi tu amadekarî nêkerd. Ma bi meaşêk kîra danê. Ma zaf zehmetîyan ancenê. Ma tena şekir girewt. Merdim vejîyeno sûke la nêeşkeno çîyêk bigîro.” 

 

Dîlan Çerçeke zî da zanayîş ke tu heyecanê roşanî nêmendo û nê çîyan vat: “Her çî bîyo vay. Ma nêeşkenê çîyêk bigîrê. Kelecanê roşanî çin o. La ma reyna zî xîret kenê keyecan newe ra awan bikerê. Ganî ma na rewşe qebûl nêkerê. Her çî bîyo vay. Krîz serê heme keyeyan de kerdo.”