QERS - Hemşaredara DEM Partîye Guner Hataya ke weçinayîşê 31ê Adare de Qaxizman girewt dîyar kerd ke no di demî yo şaredarî destê MHPyî de bî û seba şarî tu xizmet neameyo kerdiş. Gunere wina vat: “Waştişê şarî bedilnayîşê rayîrberî bî. Qerarê xo da û bedilna.” 

 

Weçînayîşê herêmî yê 31ê Adare de Partîya Têduştîye û Demokrasîyî yê Şaran (DEM Partî) Kurdistan de serkewtişêk pîl bi dest fîna. Sere de bajarê pîl, merkez, qeza û bajarokî tede 82 şaredarîyî bi dest fîna. Yew nê şaredarîyan ra zî yê Qaxizmanî ya Qersî bî. Şar weçînayîşan de qerarê xo da û dimayê 10 serrî rayîrberîya xo girewt. MHPyî ra şaredarî ame girewtiş û dîya DEM Partîye. Hemşaredare Guner Hatay û Mehmet Alkan ameyî weçînayîş û 3yê Nîsane de mazbatayê xo girewtî. 

 

Hemşaredare Guner Hatay, der barê texrîbatê 10 serran ê MHPyî û weçînayîşan de qisey kerd.

 

 ‘Şar aciz bîbî’ 

 

Gunere da zanayîş ke xebatê weçînayîşî hetê şarî ra eleqeyêk pîl dî û cinîyan nê weçînayîşî de rolêk muhîm kay kerd. Gunere ard ziwan ke xeylê xebatî rayîr ra berdê û wina vat: “Şar rayîrberîyê 10 serrî ra aciz bîbî. Her ca de kêmanî û gerrekerdiş ameyêne vatiş. Şar xo amade kerdbî.”

 

 ‘Musabaqayêke zehmet bî’ 

 

Gunere da zanayîş ke weçînayîş musabaqayêke zehmet bî û wina dewam kerd: “Qeza de 6 partî, 2 namzedê xoser bi temamî 8 namzedî kewtî weçînayîş. Musabaqayêk zehmet bî. Her ca de nizdîbîyayîşê sîstemî cîya bî. Xîret kerdê ke ma bitersnê. Bi vilakerdişê qert, pere, sedeqeyan xîret kerdê ke rayê şarî bigîrê. Şaredarî 10 serrî bî destê MHPyî de bî. MHP xo zaf bi hêz dîyêne. Hende xora bawer bî ke kewt weçînayîş. Nê zî mird nêkerd 700 weçînitoxî neqlê tîya kerdî. La şar nînan ra keyfweş nêbî. Tu xizmet seba şarî nêame kerdiş. Her ca îşxal kerd. Weçînayîş rê demêk kilm mend hema abîdeyêk merkeze qezaye de viraştê. Nika seba ke ma şarî rê xizmet bikerê ma do şaredarîye de cigêrayîşan bikerê. Ma do netîceyê nê çîyî de dest bi xebatan bikerê. Ma do bi taybetî seba cinî û ciwanan, babeta îstîhdam û kulturî de xebatan bikerê. Koperatîfî seba ma muhîm ê. Ma şarî rê vat vat la ma baş da fehmkerdiş ya nê nêzana. Ma do her tim şarî rê vajê. Qezaya ma bi darê fêkîyan yena zanayîş. Çimeyê îdareyî yo. Say û mişmiş zêde est ê. Çemê Arasî mîyanê qezaye ra derbaz beno. La ma problemê awe ciwîyenê. Ma do problemê awe çareser bikerê.”

 

 ‘Tu xizmet nêame kerdiş’ 

 

Gunere dîyar kerd ke demê verê cû de reyan şaredarî bi xespkerdiş destê înan ra ameybî kerdiş. Gunere na babete de ercnayîş kerd: “Her çend ke ma şaredarî dest fînabî zî netîceyê kay, pêrodayîşan de şewa peynî AKP-MHP bî yew û şaredarî girewtî. Dima ra tu xizmet çinî bî. Yewine çîyo ke kerd îmkan seba hetgiranê xo pêşkêş kerdê. Bajar de împaratorîya tersî awan kerd. Bi temamî hetgiranê xo wey kerd. Şaredarîyêk ke ameybî xespkerdiş est bi. La şar zî qerarê xo da û înan ceza kerd.”

 

 ‘Şar seba bedilnayîşî bi qerar bî’ 

 

Gunere qiseykerdişê xo yê peyênan de bale ant serê qezaye û wina peynî kerd: “Qaxizman qezayêke pîl o. Nizdîyê 25 hezar nufusê ci est o. Ma dewan zî tewrê ci bikerê 45 hezar o. Dewijî hema hema her roje seba karê xo yenê qeza. Lazimîyê xo qeza de temîn kenê. Qeza de nêweşxane est o la doktor çin o. Werdo ke şar wazeno nêşikenê bivîno. Yanî bi kilmî tîya sey dewêke yo. Beno ke tîya de 3 HES ameyê viraştiş, la tu fêdeyê ci çin o. Şîrketê ke ameyî awankerdiş hetgiran rê yenê pêşkêşkerdiş. Seba xizmetî tu çîyêk nîno kerdiş. La şar bi qerar bî û qerarê xo da, rayîrberî bedilna.”