RIHA - Şaredarîya Curnê Reş a ke do weçînayîş bêro newekerdiş, Qeymeqamê Curnê Reşî Orhan Gazî Karataş sey qeyûm amey tayînkerdiş. 

 

Weçînayîşê herêmî yê 31ê adare de Partîya Têduştîye û Demokrasî yê Şaran (DEM Partî) Şaredarîya Curnê reşî bi dest kerd. Pêwa qerarê newekerdişê weçînayîşî, qeyûm tayînê şaredarî ame kerdiş. Merdimê namzetê AKPyî û wezîfedarê sindoqan şewa weçînayîşî adir fînayî sindoqê rayan û dima ra zî Heyetê Weçînayîşî yê Qeza rê îtîraz kerdî. Heyetî îtîrazê AKPyî qebûl kerd û qerarê newekerdişê weçînayîşî da. Weçînayîş do 2yê hezîrane de bêro newekerdiş. 

 

Qeymeqamê Curnê Reşî Orhan Gazî Karataş bi tesdîqkerdişê Walîtîya Rihayî sey Wekîlê Şaredarî yê Curnê Reşî ame tayînkerdiş. Goreyê eşkerayîya Qeymeqamtîya Curnê Reşî, Orhan do goreyê madeyê 46ine ê Qanûnê Şaredarîyan ê Hûmara 5393ine heta weçînayîşê 2yê hezîrane do qeza de Wekîltiya Şaredarê Curnê Reşî bikero. Dimayê qerarê Qeymeqamtîya Curnê Reşî bi eşkerayîyêke fermî rayaumûmî agahdar kerd. 

 

Eşkerayîya walîtî wina ya 

 

Eşkerayîya wezîfedarkerdişê Orhan Karataşî de wina ame vatiş: “Qeymeqamê ma yê Curnê Reşî Orhan Gazî Karataş heta 2yê hezîrana 2024ine de weçînayîşî yenê newekerdiş û şaredarê qeza yeno weçînayîş, goreyê madeyê 46ine ê Qanûnê Şaredarîyan ê Hûmara 5393ine sey Wekîlê Şaredarîya Curnê Reşî ameyo wezîfedarkerdiş.