AMED - MKGyî derheqê serrgêra koçê peyîn yê rojnamegere Evrîm Alataşe de dîyar kerd ke fikr û fehmê Evrîme, nuştiş û têkoşînê aye ewro înan rê bena feyzêk pîl û vat: "Her çiqas Evrîm Alataş a ke qelema azadîye û vengê edaletî ya mîyanê ma ra koç kerda zî do her tim fehmê aye mîyanê ma de biciwî yo." 

 

Komeleya Rojnamegeranê Cinîyan ê Mezopotamyaye (MKG), derheqê 14ine koçê peyîn yê Rojnamegere Evrîm Alataş de eşkerayîya nuşteyî da. Eşkerayîye de ame neqlkerdiş ke ê do sey MKGyî rayîrê têkoşînê Evrîme de şêrê û ame vatiş: "Ma serrgêra koçê peyîn yê Evrîme de aye bi rêzdarî û bi hesretêke pîl anê vîrê xo. Ma do şîyayîşê pey fikr û fehmê aye dewam bikerê." 

 

Dewamê eşkerayîye de wina ame vatiş: 

 

“Rojnamegere Evrîm Alataşe vengê fehmê azadî, serewedaritişî û vengê qelema bi cesaret bîye. 14 serrî serê koçkerdişê peynîn ê Evrîme ra derbaz bî. Ma 14ine koçê peyîn yê Evrîme de aye bi rêzdarî û bi hesretêke pîl anê vîrê xo. Evrîme 15ê Nîsana 1976ine de dewa Golpinarî ya qezaya Arganî ya Meletî de ameye dinya. Aye cuya xo ya rojnemegerî û nuştoxî de her tim bîye pawitoxa edaletî, azadî û pawitoxa heqê merdiman. 

 

Evrîma ke perwerdeyê aye dewa aye de dest pêkerd û dima ra Stenbol de dewam kerd, serra 1994ine de gama ewilî ya rojnamegerîye eşt. Rojnameyê sey Yeni Polîtîka, Demokrasî, Ozgur Bakiş, Ulkede Ozgur Gundemî de muxabîrîye kerd. Dima ra zî sey editore karê xo dewam kerd. Evrensel, BîrGun û Ozgur Polîtîkaye de nuştoxîya quncike kerd. Makaleyê aye Esmer, Bîrîkîm, Amargî, Sîyahî û Tîroj de ameyî weşanayîş. Evrîme serra 2003ine de weşanxaneyê Aramî de "Hîkayeyê Cîyabîyayîşê Mayozî" vet. "Her Versîya Koyî Kewena Serê Behrî" zî serra 2009ine de Weşanê Îletîşîmî ra vet. Evrîme kitabanê xo de bale ant serê hîkayeyê trajîkomîkî yê Kurdistanî. Evrîme eynî wextî de senarîsta filmê “Min Dît” a. Evrîme seba nêweşîya kanserî ya kewte de 12ê Nîsana 2010ine de Amed de dinyaya xo bedelnaye. Labelê fikr û fehmê Evîne, nuştiş û têkoşînê aye, ewro ma rê beno feyzêk pîl. Ma rê beno rayîr. 

 

Ma sey Komeleya Rojnamegeranê Cinîyan ê Mezopotamyaye (MKG), ancî vanê ke ma do têkoşîn û mîrasê Evrîm Alataşe xo vîr ra nêkerê. Ma ancî vanê roşnîya aye ya rayîrê edaletî û azadîye do rayîrê ma bimojno. No bi 14 serrî yo Evrîme mîyanê ma ra koç kerda û şîya. Ma serrgêra koçê peyîn yê Evrîme de aye bi rêzdarî û bi hesretêke pîl anê vîrê xo. Ma do şîyayîşê pey fikr û fehmê aye de dewam bikerê. 

 

Ma ancî Evrîme bi rêzdarî anê vîrê xo û ma bale ancenê serê muhîmîya yadkerdişê aye, wendişê nuşteyê aye û fehmê aye. Her çiqas Evrîm Alataşa ke qelema azadîye û vengê edaletî mîyanê ma ra koç kerda zî do her tim fehmê aye mîyanê ma de biciwîyo. 

 

Komeleya Rojnamegeranê Cinîyan ê Mezopotamyaye (MKG).”