MERKEZÊ XEBERAN - DÎBî roniştişê qerarî yê Dewaya Kobanê ra ver ke do 17ê nîsane de pê bêro, venga dezgeh û partîyê sîyasî kerd ke vera bêhuqûqîye de reaksîyon bimojnê. 

 

Yewîya Seba Demokrasî (DÎB) roniştişê qerarî yê Dewaya Kobanê ra ver ke do 17ê nîsane de pê bêro, eşkerayîyêke nuştekî weşêna. 

 

Eşkerayîya ke bi sernameyê “Çîyo ke Dewaya Kobanê de yeno muhakemekerdiş hêvîya aştî û demokrasî yo” ame weşanayîş de nê çîyî ameyê vatiş: “Dewa bêhuqûqî ya. Sere de heqê muhakemekerdişê adilane û pawitişê heme heqê ke binê asayîşê destûrê bingeyîn de yê, ameyê binpaykerdiş. Dosyayan de tu delîlêk çin o. Bi desan pêşnîyaznameyê seba vetişê raşte yê berpirsîyarîyê mergê ke protestokerdişê Kobanê de qewimîyayî, bi rayê AKP û MHPyî ameyê redkerdiş. 

 

‘Çîyo ke yeno muhakemekerdiş hêvîyê nê welatî yê aştî û demokrasî yo’ 

 

Sey Yewîya Seba Demokrasî ma venga şarî, dezgeh û partîyê sîyasî yê ke vera hovîtîya DAIŞî de yê, hetgirê demokrasî, huqûq û aştîye kenê ke vera nê bêhuqûqî de reaksîyon bimojnê. Çîyo ke yeno muhakemekerdiş hêvîyê nê welatî yê aştî û demokrasî yo.”