Melek Avci

 

ANQARA - Verfeka Komîsyonê Huqûqî yê DEM Partî Sevda Çelîk Ozbîngole seba roniştişê dewaya Kobanê veng kerd û vat: "Qeraro ke na dewaye de bêro dayîş raşte raşt şaranê Tirkîya yê ke hêvîya sibaroja demokratîke kenê, eleqedar keno. Ma venga tewrbîyayîşê dewaye rayaumûmîye rê kenê." 

 

Roniştişê qerarî yê Dewaya Kobanê ke 17 ci ra tepişte pêro pîya 108 kesî yenê muhakemekerdiş do 17ê nîsane de bêro organîzekerdiş. Heyetê Rayîrberîyê Merkezî (MYK) yê Partîya Têduştîye û Demokrasîyî yê Şaran (DEM Partî) derheqê roniştişî de bi sernameyê “Seba 17ê Nîsane veng: Dewaya Kompasî ya Kobanê de ma kişta azadîye de ca bigîrê” rojanê verênan de eşkerayîyêke nuştekî dabî.  

 

Derheqê dewaye de Verfeka Komîsyonê Huqûqî yê DEM Partî Sevda Çelîk Ozbîngole ajansê ma rê qisey kerd. 

 

Sevda dîyar kerd ke dewa de heme delîllê bîyaye hetê muhakemeyî ra nêameyê dîyîş û vat: "Dewaya Kumpasî ya Kobanê de îhlalê pîlî bi akerde yenê kerdiş. Prosesê huqûqî de muhakeme bî haletê sîyasetî. Her çend ke raşte raşt de bibo zî mehkemayêke taybet est a. Muhakemeyo ke xoser yeno vatiş tena xizmetê îqtîdarê sîyasî keno." 

 

Sevda da zanayîş ke raşteyê mîyanneteweyî de zî sey dewayêke buhuqûqî yena ercnayîş û wina vat: “Ame testpîtkerdiş ke serekê mehkema sûc kerdo û nê roniştişî rayîr ra beno. Bi israr bêhuqûqî dewam keno. Bi desan reyan derheqê Fîgen Yuksekdag û Selahattîn Demîrtaşî de qerar hetê muhakemeyê mîyanên û mîyanneteweyî ra ame dayîş. Vera qerarê Mehkemaya Heqanê Merdiman a Ewropa ra reyna zî serbest nêameyê verdayîş. Her çend ke wextê tepiştişê sîyasetmedaran pirr bibo zî serbest nînê verdayîş. Muhakemekerdişêk adilane pê nîno û hemverê tepişteyan de muameleyêk xirab yeno rayîr ra berdiş." 

 

Sevda qiseykerdişê xo yê peyênan de da zanayîş ke qeraro ke do rojê verênan de seba dewaye bivejo, seba rayîr ra berdişê demokrasî muhîm o û wina peynî kerd: "Qeraro ke bêro dayîş şarê Tirkîya eleqedar keno. Hemverê şarê kurdî û îradeyê sîyasî de neheqîyêk pîl yeno kerdiş û huqûqê xo yê bîyaye zî binpay kenê. Ma nê çîyî qebûl nêkenê. Ma venga rayaumûmî kenê ke 17ê Nîsane de yanî siba Sîncan de bî û vatişê xo yê caardişê edaletî pîl bikerê."