Mîdye Miqted

 

HELEB - Keyeyê Şehîdan ê Helebî reaksîyon vera nizdîbîyayîşê xo yê vera hêrişanê goristanê Çemê Elika û Sisê yê Licê yê Amedî, mojnayî û vatî: “Ma sey keyeyê şehîdan dejê heme keyeyanê şehîdan bi înan reyde pare kenê û nê caardişan bi şîdet şermizar kenê. Ma venga rêxistinê heqanê merdiman kenê ke vernîya nê caardişan bigîrê. Ewro dewleta tirkan hêrişê ercanê ma kena. Esteyê şehîdanê ma ra tersenê.” 

 

Roşanê Remezanî ra ver goristanê Çemê Elika û Sisê yê qezaya Licê ya Amedî hêriş pê ameyî. Vera nê hêrişan keyeyê şehîdan û hemwelatijan xeylê cayan de reaksîyon mojnayî. Nê caardişan ra dima keyeyê şehîdan ê Helebî reaksîyonê xo mojnayî û vatî: "Nê caardişê ke dewleta tirkan kena teberê merdimîye yo û tebere dînê Îslamî yo. Ganî hesab bêro persayîş" 

 

'Senî ke Efrîn de nê caardişî qewimîyayî ewro Amed de newe kenê’ 

 

Rayîrbera Hemcuya Şehîdan ya taxa Rojhelatî yê bajarê Helebî Hêvîn Mihemede da zanayîş ke AKP semedo ke rijîyeno caardişê winasî zêde keno û wina vat: “Dima ke dewleta tirkan Vakurê Kurdistanî de şaredarîyan de bin kewt, hêrs û nefretê xo xerepnayîşê goristananê şehîdanê ma de vet. Reaksîyonê xo yê hemverê şarê kurdî vet raşte. No zî reya yewine nîyo ke dewleta tirkan kena. Sewbîna bajarê Efrînî de zî nê caardişî qewimîyayî. Bi taybetî dimayê îşxalkerdişê bajarî ke hetê dewleta tirkan û çeteyanê ci ra ame îşxalkerdiş, goristan bi temamî ameyê xerepnayîş, tirmê şehîdan binê herre ra ameyî vetiş û herinda înan zî kerdê bazar. Yew nê goran ra ê şehîd Avesta Xabûre bî." 

 

‘Caardişê dewleta tirkan îslamî ra dûrî yo' 

 

Qiseykerdişê xo yê peyênan de Hêvîne dîyar kerd ke karo ke dewleta tirkan kena, karê tewr xirab o û wina vat: “Karo ke dewleta tirkan kena yê tewr xirab o û tebere merdimîye yo. Sewbîna goreyê peymeyê dînê îslamî nîyo. Eke dewleta tirkan xo girêdayê dînê îslamî hîs bikera wa bizana ke nê caardişê dewleta tirkan qanûnê dînê îslamî ra dûrî yo. Hêrişê vera goristanan dûrê exlaqî yo."

 

 'Hêrişê serê goristanan dûrê exlaqî yo' 

 

Rayîrberîya Meclîsê Keyeyê Şehîdan ê taxa Rojhelatî yê bajarê Belebî ra Cûmene Hemîde derheqê hêrişê gorsitananê şehîdan ê Amedî de ercnayîş kerd û wina vat: “Dimayê ke dewleta tirkan weçînayîşê Vakurî de bin kewt, seba ke îrade û hêzê şarê kurdî çinî bikera bi heme karê bêexlaqî kewt mîyanê xîretkerdişî. Hêrişê goristanê şehîdan ê Amedî ame kerdiş. No exlaqê îslamî ra dûrî yo. Bajarê Efrînî de zî caardişê winasî virazîyayê. Tirmê tutanê ma binê herre ra vetî û kes nêzano berdê kam ca.”

 

'Dewleta tirkan hêrişê ercanê ma kena' 

 

Qiseykerdişê xo yê peyênan de Cûmene bi şîdet caardişan şermezar kerd û venga rêxistinê heqanê merdiman kerd ke vernîya nê caardişan bêro girewtiş û vat: “Ma sey keyeyê şehîdan dejê heme keyeyê xo yê şehîdan bi înan reyde pare kenê û nê caardişan bi şîdet şermezar kenê. Ma venga rêxistinê heqê merdiman kenê ke vernîya nê caardişan bigîrê. Ewro dewleta tirkan hêrişê ercanê ma kena. Esteyê şehîdanê ma ra zî tersena."