Rozerîn Gultekîn

 

STENBOL - Sereka Komeleya Wextê Cinîye Dîlek Başalane derheqê pawitişê cewherî ke Şirnex de vejîyayo raşte û vengvetişê caardişê şerê taybetî ke bi destê çawîşê pisporî yê şikdarê tacîzî pê ameyî de qisey kerd û vat: “Binpaykerdişê heqan ê ke cinîyê Şirnexî ci reyde rî bi rî manenê, eke ma hîs nêkerê ganî ma têkoşînê xo de persayîş bikerê. Sey cinîye karê ma nika dest pêkeno.”

 

Îqtîdar seba ke cinîyan nasname û têkoşînê înan ra dûrî bikero bi şikdarê unîformayî reyde polîtîkayê şerê taybet bi serran o serê herra Kurdistanî de giran keno. Îpek Er, Gulîstan Doku ke rojeva heme welatî de ca girewtî, netîceyê nê polîtîkayan de ameyî vînîkerdiş. Şar êdî destûr nêdano nê caardişan û pawitişê xo yê cewherî pê ano. Şirnex de nê polîtîkayî veng ameyî vetiş û 12ê Nîsane de çawîşêkê pispor 3 cinîyan tacîz kerd û bi pawitişê cewherî yê şar û cinîyan hedîse vejîya raşte. 

 

Sereka Komeleya Wextê Cinîyan Dîlek Başalane derheqê pawitişê cewherî ke Şirnex de vejîya raşte û ganî cinî se bikerê de qisey kerd. 

 

‘Senî ameyê na roje’ 

 

Dîleke da zanayîş ke polîtîkayê şerê taybetî ke bajarê Kurdistanî de dest pêkerdo vilayê bajarê Tirkîya zî bîyo û vera nê caardişan de polîtîkayê bêcezaverdayîşî zî giran bîyo. Dîleke vat: “Bi serran o ma vera şerê taybetî de têkoşîn kenê. La vengê ma nîno eşnawitiş. Ma seba cinîyê ke ameyê qetilkerdiş vejîyayê raşteyan. Gulîstan Doku, Îpek Er û xeylê cinîyê bînî êdî mîyanê ma de nîyê. Ma paştîdayîşo ke sînor nas nêkeno pawenê. Ma tena cinîyê Stenbolî nê heme cinîyan pawenê. Amed, Êlih û Şirnex de zî ma heqê cinîyan pawenê. Çîyo ke Şirnex de qewimîya no netîce yo. Ma senî ameyî na roje?” 

 

‘Hêrsê cinîyan’ 

 

Dîleke bale ant serê destergîya kesê bi unîforma û wina vat: “Ma cayo ke şîdet paweno û meşru keno de nîyê. Ma qala heqê cinîyan û heqê vatişê cinîyan kenê. Cinî bi serran hetê camêrdê bi unîformayî ra ameyî tacîzkerdiş. Înan ra tay dewa akerdê. Tay zî dinya de nîyê. Her çend ke Musa Orhan ceza bigîro zî nika teber de yo. No hêrsê komelkî yê cinîyan o. Ganî na cografyaye de edalet bibo. Ganî şikdarî bêrê cezakerdiş. Ganî ma vera nê de bibê veng û têkoşîn bikerê. Ganî ma bibê derdê hemeyan. Eke ma şîdet û binpaykerdişan hîs nêkerê o wext ganî ma têkoşînê xo de persayîş bikerê.”

 

‘Qeyûm şerê taybetî giran kerd’ 

 

Dîleke dewamê qiseykerdişê xo de bale ant serê prosesê peynî û sebebê giranbîyayîşê polîtîkayê şerî yê qeyûmî û wina vat: “Wexto ke şaredarîyê HDPyî ameyê xespkerdiş destkewtişê cinîyan est bî. Mekanîzmayê muracatî zêde bî. Xizmetê ziwan est bî. La qeyûman şerê taybet giran kerd.” 

 

Muhîmîya pawitişê cewherî 

 

Dîleke wina peynî kerd: “Ganî her gandare pawitişê xo yê cewherî pê bîyaro. Pawitişê cewherî seba merdimî mekanîzmê pawitişî yo. Rewşêka bê heq de xêrcê pawitişî rayîrêk bîn çin o. Cinî êdî wazena ke vatişê ‘nê’ heqê înan bo. Pawitişê cewherî xeylê muhîm o. Ma hêzê xo dîye. Ma sey komelî seba pawitişê dînamîkê xo ma do bibê taqîbkerdoxê nê. Rêxistinê cinîyan zî do bibê taqîbkerdoxê nê çîyî û destkewtiş dest bifînê.”