BÛRSA - Muxabîra JINNEWSî Rozerîn Gultekîn wexto ke Bûrsa de xeberan taqîb kerdêne amebî destbendkerdiş û dewa ci rê amebî akerdiş. Rozerîna ke bi îdiayê “hemverê qanûnê rayîrşîyayîş û protestoyî de muxalefetkerdiş” ameyîne muhakemekerdiş, beraet kerd. 

 

Sazgeh û dezgehê kurdî seba tecrîdê serê Rayberê PKKyî Abdulah Ocalan ke 25 serrî yo Zîndanê Îmrali de yo, bêro wedaritiş 12ê Hezîrane de rayîrşîyayîş organîze kerdibî. Muxabîr Ergîn Çaglar û muxabîra ma Rozerîn Gultekîn ke Bûrsa de rayîrşîyayîş taqîb kerdêne, amebî destbendkerdiş û derheqê înan de dewa amebî akerdiş. Roniştişê qerarî yê dewaya ke bi îdiayê “hemverê qanûnê rayîrşîyayîş û protestoyî muxalefet kerdê” amebî akerdiş 18ine Dadgeha Cezaye ya Asliye ya Bûrsayî ame kerdiş. Rozerîne û avûkatê aye tewrê roniştişî nêbî. 

 

Dozgerî mutalayê xo de derheqê Rozerîn de bi eynî îdiayî waştişê ceza kerd. Heyetê dadgehe ke dima ra qerarê xo eşkera kerd, bi sebebê sûcê ke Rozerîne pê yena sûcdarkerdiş sûc nîyê, qerarê beraetî da.