Melîke Aydin

 

ÎZMÎR - Paştîdayîşê Morî ra Dîdar Gule da zanayîş ke Seda û Sîbela ke protestoyê Wanî de ameybî tepiştiş, mîyanê tepişteyê edlî de asayîşê canê înan çin o û dîyar kerd ke heta ke heme tepişteyî serbest nêrê veradayîş do têkoşînê xo dewam bikerê. 

 

Dimayê weçînayîşê herêmî Wan de protestokerdişê xespê îradeyî de 2yê Nîsane de Îzmîr de aktîvîsta Paştîdayîşê Mori Sîbel Orkmez û Verfeka meclîsê Heqê Tutan ê Partîya Azadîya Komelkî (TOP) Sedanur Ugure ameybî destbendkerdiş û tepiştiş. Sîbel û Sedanure wexto ke berdbî zîndanê cinîyan ê Şakranî mudira zîndanî Meltem Babaoglu û gardîyanan înan tehdîd kerdbî. Endama Paştîdayîşê MYyî ya Paştîdayîşê Morî Dîdar Gule da zanayîş ke Sedanur û Sîbele waştê şêrê qawişê tepişteyê sîyasî û semedo ke hûmartişê serê payan red kerdê, ‘ma do şima bişirawê qawişê tecawizkaran’ û şima tehlîye nêkerê ameyê tehdîdkerdiş. Dîdare da zanayîş ke asayîşê canê înan çin o û eşkera kerd ke heta kesê ke ameyê tepiştiş serbest nêrê veradayîş do têkoşîn bikerê.

 

‘Bi destdergîye ameyê tehdîdkerdiş’ 

 

Avûkat Arman Atilgan da zanayîş ke Sîbel û Sedaye bi bahaneyê mukavetê polîsî kerdê, ameyê tepiştiş û qawişê edlîyan de yenê tepiştiş. Arman dîyar kerd ke Sîbele 12ê Nîsane de vejenê heyetê pêroyî û Mudira zîndanî Meltem Babaogluye bi bahaneyo ke Sîbele serê payan de hûmartiş qebûl nêkerda û tepişteyê bînan rê bîya nimuneyêk xirab, tehdîdê ‘do înfazê to bivêşa, ti do nêeşka tîya ra biveja’ tehdîd kerda. Arman wina vat: “La hema ceza nêgirewta. Dimayê pêvînayîşî gardîyan tehdîdê ‘Ma do to bierzê qawişê lezbîyen û tecawizkaran’ tehdîd kerdo. Gardîyan vato ‘na teorîst a’. Coka ra tepişteyê bîn ê qawişî nêwaştê bi aye reyde dîyalog ronê.” 

 

‘Prosesê tepiştiş û destbendkerdişî de bêhuqûqî û îşkence’ 

 

Endama MYyî ya Paştîdayîşê Morî Dîdar Gule dîyar kerd ke sey Sîbel û Sedaye bi hezaran kesî çalakîyê protestoyî de ca girewtê û aye û kesê ke ameyê destbendkerdiş ameyê îşkencekerdiş û bi hawayêkê bêhuqûqî prosesê destbendkerdişê înan ameyo dergkerdiş. Dîdare wina vat: “Roja ke ameyê tepiştiş ma polîsê ke odeya dozgerî ra nêvejîyayêne dî. Ma fehm kerd ke no talimat cayêk bîn ra ameyo û qerar sere ra ameyo dayîş. Avûkatan vatişê ‘ganî şima bêrê tepiştiş, çike memure şima ame tepiştiş’ eşnawitê. Bi nê talîmatî dozgerî sewqê tepiştişî kerd û ameyê tepiştiş. Dima ra embazê ma şirawîyayê zîdanê Şakranî.”

 

‘Qawişê edlîyan de asayîşê canê înan çin o’ 

 

Dîdare dewamê qiseykerdişê xo de nê çîyan vat: “Vera mudira zîndanî sozê waştişê tepişteyan ê qawişê sîyasî daya zî nêameyo ca. Parlamenterê DEM Partîye pêvînayîş kerdê. Embazê ma yenê tehdîdkerdiş. Teşwîqê sûcê nefretî yeno kerdiş. Sey ‘ma do şima bişirawê qawişê lezbîyenan’. Tehdîdê sey ‘şima şêrê qawişê edlîyan şima do nêvejê’ est o. Vanê ‘şima pêkewtiş bivejnê ma do şima bişiwarê qawişê tecawizkaran’. Embazê ma bi israr ê. Asayîşê canê embazanê ma çin o. Nêwazenê qawişê edlîyan de bimanê. Çike ê tepişteyê sîyasî şorişgêr ê. La dewlete nê çîyî kerda îşkence.” 

 

Dîdare qiseykerdişê xo yê peyênan de ard ziwan ke kampanyaya azadîye ya seba ‘Sîbel û Sedaye’ ke dimayê tepiştişê înan dayê destpêkerdiş dewam kena û vat ke Muhammet Orhano ke eynî rewşe de bî serbest ame veradayîş, heta tepişteyê bîn zî serbset nêrê veradayîş do têkoşînê xo dewam bikerê.