WAN - Tepişteyê sîyasî yê ke bi waştişê azadîya Abdullah Ocalanî û çareserkerdişê problemê kurdî 27êTeşrîna Peyêne ya 2023yî ra nata grevê vêşanîye de bî, 4ê Nîsane ra nata grev açarnayê hemleyêk newî. Merdime tepişteyan veng kerd ke ganî bi lezkî polîtîkayê tecrîdî peynî bibê. 

 

Rayberê PKKyî Abdullah Ocalano ke zîndanê Asayîşê Berzî yê Îmraliyî de tepişte yo no 37 aşmî yo tu xeberêke ci ra nîna girewtiş. Tepişteyê sîyasî yê zîndanê vakurê Kurdistanî û Tirkîya çarçeweya kampanyaya mîyanneteweyî ya “Abdullah Ocalanî rê azadî, seba problemê kurdî çareserîya demokratîke” 27ê Teşrîna Peyêne ya 2023yî de dest bi grevê vêşanîye bêdem û dorveger kerdbî û hemleyêk newî de grevê xo dewam kenê. Erdîşê Wanî de merdime tepişteyan reaksîyon mojna polîtîkayê tecrîdî. 

 

Merdima tepişteyî Îran Ergune da zanayîş ke lajê aye Taner Ergunî ke zîndanê Tîpê Eyî yê Burdurî de tepişte yo, 4ê nîsane ra nata çalakîya grevê vêşanîye sey ‘boykotê pêvînayîşê telefonî, keye û dadgehî’ domneno. Îrane wina vat: “Boykot vera 3 hewte mi lajê xo nêdî. Lajê mi boykot vera nêvejîyeno pêvînayîş. 3 hewteyo ke nêşina pêvînayîş. Semedo ke telefon nêakeno ma vengê ci zî nêeşnawenê. Heta ke tecrîdê serê Birêz Ocalanî nêwirzo do tecrîdê serê şarê kurdî û tutanê ma zî nêwirzo.”

 

‘Wa tepişteyê sîyasî serbest bêrê veradayîş’ 

 

Îrane dewamê qiseykerdişê xo de nê çîyan vat: “Lajê mi Taner Ergunî verê cû zîndanê Kalkandere yê Rize de bî. La yew aşme verê cû surgunê Tîpê Eyî yê Burdurî kerdê. Semedo ke dest bi grevî kerdbî tepişteyan yewbînan ra dûrî fînayê. Ma rewşa tutanê xo nêzanê û ma hîsin benê. Wa tepişteyî serbest bêrê veradayîş. Wa tecrîd wedarîyo. Ma heme binê tecrîdî de yê.”

 

‘Wa waştişê tepişteyan bêro qebûlkerdiş’ 

 

Azîze Çakire zî ard ziwan ke yewine waştişê înan aştî yo û wina vat: “Bi serran ma têkoşin kerd. Ma bi serran o têkoşînê aştîye danê. Tutê ma zerre de û ma zî teber de yenê muhakemekerdiş. Ma kurd ê. Ziwanê ma est o. Bi ziwanê xo qiseykerdiş sûc nîyo. Tepişte kewenê grev. Ganî seba tepişteyan huqûq bibo.” 

 

Ganî tecrîd peynî bibo 

 

Adalet Sayate zî dîyar kerd ke birazayê aye Ferît Şahînî zîndanê Tîpê Tyî yê Tokatî de tepişte yo, vera wextê tepiştişê ci qedîyayo zî bi hawayêkê kêfî serbest nîno verdayîş û wina reaksîyon mojna: “Ganî peynîya nê polîtîkayan bêra. Ganî no tecrîd bi lezkî peynî bibo. Abdullah Ocalan îradeyê nê şarî yo. Lîderê nê şarî yo. Ganî tecrîd bêro wedaritiş. Îqtîdar nê çîyî qebûl nêkero zî heme dinya nê çî qebûl kena.”