WAN - Hemşaredara Artemêtî Rabîa Başak Koçe projeyê derheqê Artemêtî de ajansê ma rê qalî kerd. 

 

DEM Partîye weçînayîşê herêmî yê 31ê Adare de qezaya Artemêtî bi peymeyêk pîl girewt. Rabîa Başak Koç û Cemîl Kom bîyî hemşaredarê Artemêtî. Hemşaredara Artemêtî Rabîa Başak Koçe derheqê projeyê ke cuye de bi ca bîyarê, ajansê ma rê qalî kerd.

 

‘Ma do waştişê cinîyan û şarî bîyarê ca’ 

 

Rabîaye da zanayîş ke rojê ewilî bi zîyaretê roşan û eleqeyêk pîl ê şarî derbaz kerdê û vat: “Ma personele neweyî tayîn kerd û komê neweyî awan kerd. Ma do yewî û mudirîya xo awan bikerê. Ma do projeyê xo bikerê cuye. Ma do projeyê hemşaredarê xo yê verêne bifînî cuye. Ma do waştişê şar û cinîyan bîyarê ca.”

 

‘Ma do cinîyan mîyanê çar dêsan ra bivejnê’ 

 

Rabîaye wina dewam kerd: “Cinî her tim hepsê keye yenê kerdiş û mecburî xizmet kenê. Ganî cinî her raşteyê cuye de ca biba. Ma do merkezê cuye yê cinîyan awan bikerê û cinîyan mîyanê çar dêsî ra bivejnê. Ma do projeyê xo bikerê cuye. Ma do eserê keda destê cinîyan açarnê îstîhdam. Do cinî eserê xo merkezê paştîdayîş û cuye yê cinîyan de bikerê. Do seba tutan kreş bêro akerdiş. Ma do seba cinîyan atolyeyan, semîner û kursan bidê. Do nê kursan de sertîfîka bêra dayîş. Do dersê wendiş û nuştişî bêrê dayîş. Ma do bazarê keda cinîyan awan bikerê.” 

 

Rabîaye sewbîna wina vat: “Ma do seba hemwelatijanê astengdaran projeyan ca bîyarê. Xeylê projeye ma seba înan est ê. Şar ma ra zaf çî nêwazeno. Wazeno ma kişta înan de bê û bawerîye bidê înan. Seba înan yew raşteyê cuye ke ameyo awankerdiş çin o. Ma ewnîyenê rayîran ê zî goreyê înan nîyê. Ma do seba çareserîye projeyê xo bifînê cuye.”

 

‘Ciwanî ameyoxê ma yê’ 

 

Rabîaye bale ant serê rewşa ciwanan zî û wina dewam kerd: “Şuxilnayîşê tîryakî her ke şino keweno emrê şenik. Raşteyan de bazriganîya tîryakî yeno kerdiş. Seba xelesnayîşê ciwanan ma do merkezê ciwanan bi paştîdayîşê psîkologan ciwananê xo bidê qezenckerdiş. Do raşteyê kultur, huner û sporî ciwanan tîryakî ra dûrî bikero. Ma do muhîmye bidê projeyê xo yê seba ciwanan.”

 

‘Na şaredarî şaredarîya şarî ya’ 

 

Rabîaye wina qiseykerdişê xo peynî kerd: “Artemêt turîzmî rê akerde yo. Yê ke teber ra yenê Wanî qezaya Artemêtî ra kewenê Wan. Artemêt bi xoza û gola xo yeno zanayîş. La xeylê ameyo texrîbkerdiş û her ca kerdê beton. Xeylê raşteyê aîdê şarî ameyê rotiş. Ma do qetî vernîya nê çîyî bigîrê û raşteyê aîdê şarî seba şarî bifînê cuye. Seba Artemêtî xeylê projeyê ma est ê. Ma roşan de bi şarê xo reyde bî. Na şaredarî şaredarîya şarî ya. Çi destê ma ra bêro ma do bikerê.”