Rozerîn Gultekîn

 

STENBOL - Hemsereka MATUHAY-DERî Dîlek Demîre da zanayîş ke azadiya fîzîkî ya Rayberê PKKyî Abdullah Ocalanî seba cuyêke hempar muhîm o û coka ra ganî her kes veng bido çalakîyan û ganî her kes pîya têkoşînê xo rayîr ra bero. 

 

Tepişteyê sîyasî yê zîndanê vakurê Kurdistan û Tirkîya çarçeweya kampanyaya mîyanneteweyî yê “Abdullah Ocalanî rê azadî, seba problemê kurd çareserîya demokratîke” de, 27ê Teşrîna Peyêne ya 2023yî de dest bi grevê vêşanîye yê bêdem û dorveger kerdbî. Tepişteyê sîyasî 4ê Nîsane de eşkera kerd ke çalakîya xo ya grevê vêşanîye peynî kerdê û çalakîya xo derbazê merheleyêk newî kenê. Hemsereka Komeleya Paştîdayîşê Keyeyê Tepişteyan yê Marmaraye (MATUHAY-DER) Dîlek Demîre derheqê çalakîyê hemverê tecrîdî de qisey kerd. 

 

Dîleke da zanayîş ke 25 serrî yo serê Abdullah Ocalanî tecrîd pê yeno û 37 aşmî yo tu xeberêke ci ra nîna girewtiş. Dîleke wina dewam kerd: “Paradîgmaya Abdullah Ocalanî seba cuyêke aştîyane ya şaran muhîm o. Serê heme kesê hetê aştî û demokrasîyî de tecrîd pê yeno. Ma nê çîyî qebûl nêkenê. Ma do têkoşînê nê çîyî bidê. Amancê tecrîdî no yo ke komelî girêdayeyê xo bikerê.”

 

‘Qerarê ma yê çalakîbîyayîşî est o’ 

 

Dîleke ercnayîşê xo de wina vat: “No 100 serrî yo ma bi sîstemêk nêweş reyde rî bi rî yê. No sîstem nêeşkeno êdî xo rayîr ra bero. Komel êdî azadîye wazeno. Coka ra zî çalakîyan keno. Kurdistan, Ewropa û Tirkîya de grevê tecrîdî de veng berz beno. Çalakî seba cuyêke hempar yena kerdiş. Zîndanan de grev ame destpêkerdiş. Grevê vêşanîye de tepişteyan vistî hucreyê yew kesî. Ameyê derbkerdiş. 4ê Nîsane de grev peynî kerdê û derbazê hemleyêk newî kerdê. Demê aver de qerarê ma yê çalakbîyayîşî est o.” 

 

Dîleke qiseykerdişê xo wina peynî kerd: “Ganî ma îradeyê zerrî teber de nîşan bidê. Teber de ma senî paştîdayîş bidê no xeylê muhîm o. Ganî ma nê dêsê tersî birijnê. Heta ke no nêro kerdiş do komelbîyayîş zî pê nêro. Bêrê ma pîya têkoşînê xo dewam bikerê.”