Elfazî Toral

 

STENBOL - Rojnameger Dîlan Oynaşe da zanayîş ke bi serran o zîndanan de vera polîtîkayê qirkerdişî yê dewlete de ruhê xoverdayîşî est o û vat: “Ma cinî vera her tewirê zilmî de bi deyîr û tilîlîyê xo bîyê belayê sereye înan. Mîyanê çar dêsan de tilîlî serkêşîya ma kerdêne û xoverdayîşê ma dêsan rijna. Çike timî ruhê xoverdayîşî ma de est bî. Ma şertê tecrîdî de cuye hona.” 

 

Cezaya Xebatkara Rojnameyê Azadîya Welatî Dîlan Oynaşe 26ê nîsana 2022yî de qedîya. Înfazê Dîlane ke 27ê nîsane de vejîya heyet ver, bi bahaneyê “rewşa baş çin a” ame veşnayîş. Dîlane 21ê temmuza 2022yî de reya diyîne vejîya vernîya heyetî û na rey zî bi bahaneyê “poşmantî” qebûl nêkerda înfazê aye 6 aşmî ame dergkerdiş. Dîlane 21ê çeleyê 2023yî de reya hîrêyine vejîya vernîya heyetî û na rey zî bi bahaneyê cezaya aye ya disîplînî est a, nêameye veradayîş. Heyet reya 4ine arê bî, ancî semedo ke Dîlane “poşmanî” qebûl nêkerd, serbestverdayîşê aye ame astengerdiş û 6 aşmê bîn derg kerdî. Veradayîşê Dîlane tewr peynî êlula 2023yî de ameybî dergkerdiş. Rojnamegere Dîlan Oynaşe 2016î ra heta nika bi îdîayê “endamtîya rêxistine” Zîndanê Cinîyan ê Anqaraye de ameyêne tepiştiş, 13yê Nîsane de serbest ameye veradayîş. 

 

Dîlane prosesê tepiştişê xo JINNEWSî reyde pare kerd. 

 

Zîndanan de cuyêke newî yena munayîş! 

 

Dîlane vat ke xoverdayîşê heme embazê xo yê zîndanî silam kena û wina vat: “Dewlete zîndanan de vera cinîyan de polîtîkayê şerê taybet ca ana û cinî vera nê çîyî de xoverdayîşêk pîl danê. Ma cinî teslîmê dewleta faşîst nêbenê. Vera polîtîkayê şerê taybetî de ma qet rayîrê xo ra tepîya game nêeşt. Ma rayîr ra şîyayîşê xo yê ercaye ra kêf gênê.” 

 

'Xoverdayîşê zîndanan pîl beno' 

 

Dîlane da zanayîş ke tepişte zî qet nêvanê ke ê semedê çi tepişte yê û wina dewam kerd: “Semedo ke ma zanê şarê ma bedelê pîlî da. No bedel serê milê ma hemeyan de deyn o. Bedelê pîlî bêrê dayîş zî her tim ma ser kewtê. Ma rêzdarîya xo ya hemverê xo qet vînî nêkerd." 

 

‘Serê cinîyan de teda est a’ 

 

Dîlane wina qiseykerdişê xo dewam kerd: “Zîndanan de cinî bi tedaye reyde ri bi rî yê. Cuye de yê ke tewr zêde teda vînena cinî ya. Cinî her tewirê şîdetî reyde rî bi rî manena. Zîndanan de zî her tewirê şîdetê fîzîkî û psîkolojîk est o. La ma qet tavîz nêda. Zîndanan de serê nasnameyê cinîya azade de tedayêke cidî babeta vatişî ya.”

 

‘Ma zîndanan de cuye muna’ 

 

Dîlane qiseykerdişê xo yê peyênan de nê ercnayîşan kerd: “Ma vera her tewirê polîtîkayê qirkerdişî yê dewlete de sembolê xoverdayîşî yê. Ma na raştîye vînenê. Cinî bi tilîlî û deyîrê xo bîyê belayê sereyê dewlete. Tilîlîyê ma bi înan tepîya game dano eştiş. Mîyanê çar dêsan de tilîlîyê ma, ma rê serkêşîye kenê. Ez venga têkoşîn û xoverdayîşî komelî rê kena. Wa her kes nê xoverdayîşî de ca bigêro û ma bibê vengê têkoşînê zîndanan.”