MÊRDÎN – Endamê Meclîsê Şaredarîye yê DEM Partîye, waştişê azadîya Rayberê PKKyî Abdullah Ocalanî kerdê û vatî ke wa tecrîdê zîndanan peynî bibo. Endama Meclîsê Şaredarîye ya Dêrikî Naîme Akin Kizilaye vat: "Xêrcê xoverdayîşê şarî tu çîyêk nîno destfînayîş, eke şima hêrişê ercanê ma bikerê ma do zî bi pawitişî cewab bidê." 

 

Tepişteyê PKK û PAJKî zîndanê vakurê Kurdistanî û Tirkîya de çarçewaya kampanyaya mîyanneteweyî ya “Abdullah Ocalanî rê azadî, seba problemê kurdî çareserîya demokratîke” de 27ê Teşrîna Peyêne 2023ine de dest bi grevê vêşenîya bêdem û dore kerdibî. Tepişteyê sîyasî serê nameyê Denîz Kaya de eşkerayîyêke weşan kerdî û neql kerdî ke ê seba wesîleya 4ê Nîsane Roja dayîkbîyayîşê Rayberê PKKyî Abdullah Ocalanî, çalakiya xo ya grevê veşanîye peynî kenê û çalakîya xo derbazê qonaxêke newe kerdî. Wexto ke tepişteyê sîyasî waştî bi çalakîya xo bala rayaumûmî biancê serê Îmraliyî, merdimê tepişteyan zî Nobeta Edaletî bajarê sey Mêrdîn, Amed, Êlih, Edene, Stenbol, Mêrsîn û Wanî de dayî destpêkerdiş û bi eşkerayîyêke vatî ke do çalakîya xo derbazê hemleyêke newî bikerê. 

 

Endamê Meclîsê Şaredarîya Bajarê Pîlî ya Mêrdînî ya Partîya Têduştîye û Demokrasî (DEM Partî) bale antê serê tecrîd û rewşa tepişteyan.

 

 'Dayîkan seba azadîya Abdullah Ocalanî serkêşî kerd' 

 

Endama Meclîsê Şaredarîya Artukluyî Bêrîvan Bagi dîyar kerd ke ganî tecrîdê serê Abdullah Ocalan û heme tepişteyan bi lezkî bêro peynîkerdiş û wina vat: “Tecrîd tena zîndan û serê tepişteyan de nê, serê keyeyê tpişteyan de zî dewam keno. Dayîkan zî cewabê nê prosesî girewt serê milê xo û çalakîyê muhîm ê sey Nobeda Edaletî viraştê. Dayîkan seba azadîya Abdullah Ocalanî serkêşîya ma kerd, parlamenterê ma zî bi Rayîr ra Şîyayîşê Azadîye bîyê vengê nê xoverdayîşê tepişteyan. Çalakîya ma her çend veng bida zî hema netîce çin o. Ganî ma heme vengê xo berz bikerê û bibî vengê tepişteyan. Vengê ma çend berz bibo, do vengê tepişteyan zî hende bêro eşnawitiş."

 

 'Bi taybetî ganî cinî wurza serê payan' 

 

Endama Meclîsê Şaredarîya Dêrikî Şukran Yuzale zî dîyar kerd ke ganî her kes vera na rewşe de vengê xo berz bikero. Şukrane da zanayîş ke no tena problemê tepişteyan nîyo û vat: “Ganî ma heme wurzê serê payan. Nika tepişte nê, ganî ma kesê ke teber de yê dest bi grevê vêşanîye bikerê. Tewr zêde cinî bi tesîr benê. Dayîkî nêeşkenê şêrê zîndanan û tutê xo bivînê. Bi taybetî ganî cinî wurza serê payan."

 

 'Xêrcê xoverdayîşî şarî tu çîyêk nîno destfînayîş’ 

 

Endama Meclîsê Şaredarîye ya Dêrikî Naîme Akin Kizilaye zî vîst vîr ke no demêk dergo ke zîndanan de tecrîd yeno protestokerdiş û vat: “Ganî tecrîd asayî nêro dîyîş. Na rewşe tesîr serê heme komelî de kena. Coka ra waştişê tepişteyan meşru yo û ganî bi lezkî bêro qebulkerdiş. Ganî dewlete goş bida nê waştişan. Her kesê ke herra xo hes keno ganî bibo vengê tepişteyan. Seba peynîkerdişê tecrîdî ganî tecrîd komelî rê baş bêro fehmkediş. Senî ke Wan de şar vera destronayîşê îradeyî de vejîya û waştişê îradeyê xo kerd, ganî vera tecrîdî de zî eynî çî bêro kerdiş. Seba nê zî ganî bi lezkî têgêrayîş bibo. Xêrcê xoverdayîşî şarî tu çîyêk destfînayîş. Eke şima hêrişê ercanê şarî bikerî ma do bi xoverdayîş cewab bidê."