WAN - Parlamentera DEM Partî ya Wanî Gulcan Kaçmaz Sayyîgîte derheqê hêrişê hemverê çapemenîye qisey kerd û vat: “Netîce se beno wa bibo embazê ma yê ke qelema heqîqetî erd de nêverdenê estê.” 

 

Çarçeweya tehqîqato ke Serdozgerîya Komare ya Stenbolî rayîr ra berda, 9 rojnamegerî ameyî destbendkerdiş û 22yê Nîsane de saetanê şewê de Belçîka de polîsan sereştişê Stêrk TV û Medya Haber TVyî kerd. Reaksîyonê vera hêrişan her ke şino pîl beno. Parlamentera Partîya Têduştîye û Demokrasîyî (DEM Partî) yê Wanî Gulcan Kaçmaz Sayyîgîte derheqê caardişê hemverê kedkarê çapemenîya azade de ajansê ma rê qisey kerd.

 

‘Teda buhuqûqî ya’ 

 

Gulcane da zanayîş ke Tirkîya bi serran o hemverê kedkarê çapemenîya azade de polîtîkayê tedaye pê ana û xeylê rojnamegerî semedo ke meslekê xo îcra kenê nika tepişte yê, xeylê zî dewa înan rê ameya akerdiş. Gulcane ard ziwan ke tedayê ke Tirkîya de yenê kerdiş, serê pêroyê welatî de tesîr keno û wina vat: “Hetê trajîk no yo ke teda welatê Ewropa de zî vejîyaya raşte. Nîmeyê şewe de Belçîka de erzenê serê awanîya Stêrk TV û Medya Haber TVyî. Zirar danê kelepulê înan, kabloyê înan birnenê û vilayê her ca kenê. Zaf trajîko ke ma nê caardişan Tirkîya de vînenê. No sereştiş operaysonê ke Tirkîya de yenê kerdiş ard vîrê ma. Coka ra teda û hêrişî yewbînan ra cîya nîyê.”

 

‘Adetê bi serran o dewam keno’ 

 

Gulcane zîyaretê serekkomar Tayyîp Erdoganî yê Iraqî zî vist vîr û vat ke no zîyaret de pêkerdişêk ke 26 serrî ra pê yeno ame kerdiş û wina dewam kerd: “Operasyon, bêhuqûqî, caardişê teberê demokrasî, ganî sey operasyonê hemverê cinî, xoza, kurdî û deskewtişê kurdan bêro ercnayîş. Bi serran o bi caardişê teberê huqûqî raştîyan nimnenê. La bi serran o adetêk çapemenîya azad û têkoşînêk ke dewam keno est o. Netîce se beno wa bibo ma zanê ke embazê ma yê ke qelema heqîqetî erd de nêverdenê est ê.”

 

‘Konseptêke şerê newî dewre de yo’ 

 

Gulcane qiseykerdişê xo yê peyênan de da zanayîş ke bi seserran o ke xîret kenê ziwan, kulturê kurdî çinî bikerê û wina vat: “La vera nê raştîye de şarêk ke têkoşîn keno est o. Ma bi îqtîdarêk ke bi polîtîkaya şerî bîyayîşê xo dewam keno reyde rî bi rî yê. Tabîî konseptêke şerê newî dewre de yo. Ma nuqtaya ke Tirkîya ameya vînenê. Hetê ekonomî, sîyasî û komelî de xetemîyaya. Seba ke nê raştîyî nêrê dîyîş û nerê eşnawitiş hemverê çapemenîya azade de operasyon est o. Ganî her kes kişta kedkarê çapemenîye de ca bigîro. Ganî heme kes û dostê kurdan, kurdî vera tedaya serê çapemenîye de îtîrazê xo bikerê û wayîrê çapemenîye bivejê.”