Melek Avci

 

ANQARA - Derheqê hêrişê hemverê rojnameger û çapemenîya kurdî de raşteyê mîyanneteweyî ra reaksîyon zêde bîyê. Ercnayîşê ke ameyê kerdiş de wina vajîya: “Rojnamegerî hetê hêz û ekîbê asayîşê tirkî ra bi hawayêkê rutîn bi destbendkerdiş, zilm, tacîzê qanûnî û tepiştişî reyde yenê rî bi rî.” 

 

Belçîka de 23yê Nîsane de saetê şewê de polîsan eşt serê studyoyê Sterk Tv û Medya Haber TVyî. Saetê serê sibayî de zî Stenbol, Anqara û Riha de 9 rojnamegerî ameyê destbendkerdiş. Operasyonê hemwext ê vera çapemenîya azade eynî wext de raştê zîyaretê serekomarê AKPyî Tayyîp Erdoganî yê Iraq û Başurê Kurdistanî ame. Dimayê hêrişan xeylê eşkerayîyê şermezarkerdişî ameyê dayîş.

 

‘Ma tedayê Belçîka û Tirkîya şermezar kenê’ 

 

Rojnameger Bethany Reîlleya ke serê nameyê kovara heqanê merdiman New Internastîonalîstî ercnayîş kerd vat ke tedayê hemverê rojnamegerê kurdî de înan keno mîyanê qesawetî. Bethanye wina vat: “Polîsê Belçîka 23yê Nîsane de saetê serê sibayî de eştê serê televîzyonê kurdî. Ma şikin ê. Tirkîya de rojnamegerê kurdî binê teda de yê. Semedo ke xeberê derheqê heqê şarê kurdî de virazenê yenê tepiştiş. Rojnamegerê kurdî yê Ewropa zî bi eynî tedaye reyde yenê rî bi rî. Şewa 23yê Nîsane Stenbol û Anqara de rojnamegerê kurdî hedef ameyî girewtiş. Ma veng kenê ke bi lezkî rojnamegerî bêrê veradayîş. New Internatîonalîst tedaya Belçîka û Tirkîya şermezar keno.”

 

‘Nê hêrişî nînê qebûlkerdiş’ 

 

Edîtora The Coalition For Women In Journalism (CFWIJ) ke pêroyê dinya de binpaykerdişê azadîya çapemenîye keno belge, Inge Snîpe zî serê nameyê dezgehî de qisey kerd û da zanayîş ke dimayê Roja Rojnamegerê Kurdî no şîdet ameyo kerdiş û ard ziwan ke ê nê şîdetî şermezar kenê. Ingeye wina dewam kerd: “Women Prees Freedom, tedaya serê çapemenîya kurdî, rojnamegerê kurdî şermezar kena. Saetê serê sibayî de mîyanê înan de çar rojnamegerê cinî zî est bî pêro pîya 9 rojnamegerî ameyê destbendkerdiş. No nizdîbîyayîş û hêrişê selahîyetdarê tirkan nîno qebûlkerdiş.” 

 

Zilm, tacîz û destbendkerdişê rutînî 

 

Ingeye wina qiseykerdişê xo peynî kerd: “Hemverê nê rojnamegeran de zilm, tacîzê ke qanunî û destbendkerdişê rutîn est o. No nimuneyê diyîne serra 2024î de pê ame. Belgeyê ke ma vejenê raşte de rojnamegerê kurdî zafane bi sûcdarîya girêdayeyê rêxistinê PKKyî, yenê sûcdarkerdiş. Tedayê serê çapemenîye ma keno şikan mîyan. Ganî bi lezkî peynîya na kampanaya tedaye ya serê çapemenîya kurdî bêra.”