Rozerîn Gultekîn

 

STENBOL - Vera krîzê ekonomîye û binpaykerdişê kede de do kedkarî 1ê Gulane de raşteyê Taksîmî de bê. Sereka Şûbeyê MMOye ya Stenbolî Ezgî Kiliç û sekretera pêroyî ya KESKî Sevgî Yilmaze dîyar kerdê ke do şar seba pawitişê heqanê xo raşteyan de bo 

 

Netîceyê polîtîkayê şerî yê îqtîdarî de krîzê ekonomî roj bi roje giran beno. Îqtîdar xêrcê feqîrîye tu çîyêk nêdano şarî û seba vernîgirewtişê rewşe ganî her ca de têkoşîn bêro dayîş. Bi serran o vengê xoverdayîşê karkeran berz beno û do şar 1ê Gulane de seba peynîbîyayîşê polîtîkayan raşteyan de bo. 

 

Konfederasyonê Sendîkaya Kedkaranê Rayapêroyî (KESK), Konfederasyonê Sendîkaya Karkeranê Şorişgêrî (DÎSK), Yewîya Odeyê Muhendis û Mîmaranê Tirkî (TMMOB), Yewîya Tabîbanê Tirkan (TTB), Yewîya Hekîmê Didanan yê Tirkan (TDB) bi eşkerayîya ke dayî dîyar kerde ke Raşteyê Taksîmî heqê karkeran o û vatî ke do 1ê Gulane de raşteyan de bê. 

 

Sereka Şûbeyê Odeya Muhendîsê Makînayî (MMO) ya Stenbolî Ezgî Kiliç û Sekretera Pêroyî ya KESKî Sevgî Yilmaze 1ê Gulane ra ver venga her kesî kerdê ke raşateyan de bê. 

 

1ê Gulane bi feqîrîyêke giran yeno pêşwazîkerdiş 

 

Sekretera Pêroyî ya KESKî Sevgî Yilmaze da zanayîş ke şar 1ê Gulana 2024î bi feqîrîyêke pîl pêşwazî keno û wina vat: “Fatureya krîzê ekonomîye karkeran rê yena birnayîş. Kedkar, cinî, ciwan bedelê nê danê. Îtîrazê tewr pîl ê 1ê Gulane do feqîrîye rê nê bo. Feqîrî rewşêke normal nîya. Na serre de wendekarê ke mekteban de vêşanîye vera hişê xo şiyê, wendekarê ke nêeşkayê pereyê serwîsan bidê û mekteban terk kerdê, nêweşê ke xizmet nêgirewtê ameyî qiseykerdiş. 1ê Gulane bi nê çîyan şekil beno. Cografyaya ke tede demokrasî çin a, otorite zêde bîya de bedelê tewr giran cinî danê. Cinî bedelê otorîtebîyayîşî danê. Tirkîya de yew roje de 3 cînayetê cinîyan virazîyeno. Yew sloganê esas ê 1ê Gulane ‘Şîdetê cinîyan rê nê’ yo. Ma venga îqtîdarê sîyasî kenê ke ILO 190 îmze bikero.” 

 

Do bi sloganê ‘şerî rê nê’ raşteyan de bê 

 

Sevgîye dewamê qiseykerdişê xo de bale ant serê kaosê dinya ê serê kedkar, cinî û ciwanan ke ameyê qiseykerdiş û wina vat: “1ê Gulane yew roja têkoşînî ya. Butçe şerî rê yeno birnayîş. Ma wazenê butçe şerî rê nê wa şarî rê bêra birnayîş, xizmetê şarî bikera. La butçeya şarî yena xespkerdiş. Ma cinîyî bi sloganê ‘şerî rê nê biciwîyo têduştîya şaran’ raşteyan de bê. Ma do bi waştişê xo 1ê Gulane pîroz bikerê.”

 

‘Venga ma pêvînayîşê Taksîmî yo’ 

 

Sereka Şûbeyê Odeya Muhendîsê Makîneyî (MMO) ya Stenbolî Ezgî Kiliçe zî eşkera kerd ke proseso ke krîzê ekonomîye her ke şino giran beno ra derbaz benê û şar roj bi roje hîna feqîr beno. Ezgîye dewamê qiseykerdişê xo de wina vat: “Dewlemendî hîna zêde dewlemend benê û feqîrî zî her ke şino feqîr benê. Ma rojê winasî ra derbaz benê. Ma sey karkerî do 1ê Gulane de raşteyan de bê. Problemê karker û kedkaran bîyê yew. Bi hawayêkê cidî têkoşînê cuye est o. Ma rojê zor û zehmetin ciwîyenê. Ma heme kesî pawenê Raşteyê Taksîmî. Ganî ma vengê xo berz bikerê û tewrbîyayîş zêde bibo. Venga ma pêvînayîşê Taksîmî yo.”