Elfazî Toral

 

STENBOL - Înîsiyatîfê Dayîkê Aştîye yê Stenbolî dîyar kerd ke dewleta Tirke zîndanan de vera tepişteyan de sûc kena û vat: “Heqereto ke dewlete kena ne ma û ne zî tutê ma qebûl kenê. Waştişê tutê ma nînê qebûlkerdiş, ma do xerîtaya têkoşînî newî bikerê. Ma venga têkoşînî komelî rê kenê.” 

 

Rayberê PKKyî Abdullah Ocalano ke zîndanê Asayîşo Berd ê Tîpê Fyî yê Îmraliyî de tepişteyo ra 38 aşmî yo xebere nîna girewtiş. Tepişteyê sîyasî yê zîndanê vakurê Kurdistanî û Tirkîya de çarçewaya kampanyaya mîyanneteweyî ya “Abdullah Ocalanî rê azadî, seba problemê kurdî çareserîya demokratîke” de 27ê Teşrîna Peyêne 2023ine de dest bi grevê vêşenîya bêdem û dore kerdibî. Tepişteyê sîyasî 4ê Nîsane Roja dayîkbîyayîşê Rayberê PKKyî Abdullah Ocalanî de çalakîya xo derbazê qonaxêke newî kerd û aye roje ra nata nêvejîyenê pêvînayîşê ri bi rî, pêvînayîşê telefonî red kenê û bi çalakîya mehkemayan çalakîya xo dewam kenê. 

 

Înîsiyatîfê Dayîkê Aştîye yê Stenbolî derheqê têkoşîn û waştişê tepişteyan de venga ‘Wa her kes bikewo têgêrayîş mîyan û bibo hamkarê têkoşînê ma’ kerd. 

 

Waştişî zelal ê! 

 

Dayîka Aştîye Ayten Toprake da zanayîş ke seba tepişteyan çi lazim bikero amade yê û vat: “Ma dayîkê aştîye wazenê tepişte serbest bêrê verdayîş. Wa dewlete vengê ma bieşnawa. Ma dayîk her roje têkoşîn dane, çalakî û nobetan pê anî. Qey kes ma nêeşnaweno? Kesebaya dayîkan veşêna. Tepişteyî çalakîya boykotî de yê. Qey waştişê înan çinî yo. Qey vengê tepişteyan nîno eşnawitiş. Ganî her kes hîssin têbigêro. Wa her kes seba tepişteyan destê xo bikero binê kerra.”

 

 ‘Dewlete sûc kena’ 

 

Aytene ard ziwan ke dewlete sûc kena û wina dewam kerd: “Heme dinya û şar zano ke Tirkîya sûc kena. Bi serran o serê kurdan de teda est a û heqê înan destê înan ra yeno girewtiş. Şarê Kurd vera nê caardişan de têkoşînê xo dewam keno. Hemverê tpişteyan û Şarê Kurdî de heqaret est o. Yê ke vengê xo kenê yenê tepiştiş. Wazenê ma bêveng bikerê. Heqê ma destê ma ra yenê girewtiş. Nêverdenê ma heqanê xo bipawî. Yewine cayê çareserîye Abdullah Ocalan o. Ma do heta peynî têkoşîn bikerê.” 

 

‘Ma mekanîzmaya muhakemekerdiş û edaletî şermezar kenê’ 

 

Înîsîyatîfê Dayîkê Aştîye ra Fatma Yilmaze zî ard ziwan ke wexto ke tepişteyê sîyasî grevê vêşanîye de bî dayîkan zî bi çalakîya Nobeta Edaletî paştî dayî tepişteyan û vat: “Seba ke çalakîya tutanê ma netîce bigêra ma pîya têkoşîn da. Yewine amacê ma caardişê waştişê tutanê ma bî. Bi serran o ma seba aştîye xover danê û israr kenê. Ma her tim hetê aştîye de bî. Waştişê ma zelal bî. Ma mekanîzmaya muhakemekerdişî ya dewlete qebûl nêkenê. Ma sîstemê edalet û muhakemeyî şermezar kenê. Ma venga heme hemwelatijan kenê ke bibî hemkarê têkoşînî. Ma şer nêwazenê. Ma aştî wazenê.”

 

 ‘Ne ma û ne zî tutê ma nê çîyan qebûl kenê' 

 

Merdima tepişteyî Gulsum Dage zî wina vat: “Têkilîya tepişteyan ameya birnayîş. Tepişte nêvejîyenê pêvînayîş. Heta ke no zilm û îşkence peynî nêbo do tutê ma tepîya game nêerzê. Tutê ma zîndanan de binê zilmî de yê. Heqê înan yeno binpaykerdiş. Ma cîya tutê ma cîya yenê tecrîdkerdış. Bi bahaneyê cîya pêvînayîş yenê astengkerdiş. Ne ma û ne zî tutê ma nê zilmî qebûl nêkenê. Ma şopê tutanê xo de yê. Ma tecrîdî qebûl nêkenê.”