Rozerîn Gultekîn

 

STENBOL - Endama TJK-Eye Kezban Dogane derheqê di kampanyayê ke çarçeweya hemleya Abdullah Ocalanî rê azadîya fîzîkî de dîyayê destpêkerdiş de vat: “Felsefeya Rayber Apo cuya cinîyan bedilna. Cinîyê ke cuya înan bedilîyayo vîdeoyan ancenê. Ganî seba çareserîye heme rayîrî bêrê cerebnayîş.” 

 

Rayberê PKKyî Abdullah Ocalano ke 25 serrî yo zîndanê Asayîşo Berz ê Tîpê Fyî yê Îmraliyî de tepişte yo, 38 aşmî yo tu xeberêke nîna girewtiş. Hemleya "Abdullah Ocalanî rê azadî, problemê kurdî rê çareserî" ya ke bi amancê azadîya fîzîkî ya Abdullah Ocalanî dîya destpêkerdiş sewîyeya diyîne de dewam kena. Çarçeweya kampanyaya ke dîyaya destpêkerdiş de Ewropa de zî Têgêrayîşê Cinîyê Kurdî kampanyayan virazneno. Têgêrayîşê Cinîyê Kurdî yê Ewropa (TJK-E) kampanyaya "Hezar cinî, yew veng" û kampanyaya CPTyî rê şirawitişê mektuban dayî destpêkerdiş û xebatê xo dewam kenê. 

 

Endama TJK-Eye Kezban Dogane derheqê xebatê ke rayîr ra benê de ajansê ma rê qisey kerd. 

 

‘Heta ke bibo hezar vîdeo do kampanya dewam bikera’ 

 

Kezbane da zanayîş ke dimayê hemleye TJK-E bi nameyê "Do azadî ser bikewa" forumêk mîyanneteweyî pê ard û seba ke hemle bi serkewe netîce bibo munaqaşa rayîr ra berdê û dima ra dest bi kampanyayan kerdê û vat: “Kampanyaya ‘Hezar cinî, yew veng’ çarçeweya hemleyî de ya. Amancê na kampanyaye no bî ke fikrê Rayber Apoyî senî vilayê dinya bîyo. Fikrê Rayber Apoyî senî xo resnayo cinîyan. Ma waşt ke nê çîyî bivejnê raşte. Seba cinîyan Abdullah Ocalan çi îfade keno? Ma pers kerd. La her cayê dinya de senî serê cuya cinîyan de tesîr viraşto. Nika ma 300 ra zêde vîdeo kom kerd. Heta ke bibo hezar do dewam bikero. Nê vîdeoyan de ma dî ke Rayber Apo azadî dayo cinîyan.”

 

 Mektube CPTyî dana zorî 

 

Kezbane dewamê qiseykerdişê xo de ard ziwan ke 25 serrî yo verê CPTyî de çalakîyan pê anê û pêvînayîş kenê. Kezbane vat: “CPT verê cû kêm bibo zî malumat dayêne. La ewro nêdano. Ma wazenê CPTyî teşhîr bikerê. 2022yî de CPT şî Tirkîya û vat ke şîyê Îmrali zî. La dima ra vejîya raşte ke pêvînayîş nêameyo kerdiş. Zîyaretê 2024î de nameyê Îmraliyî derbaz nêbî. Pênêameyîşê pêvînayîşî nîşan dano ke paştîdayîş danê polîtîkayê Tirkîya û tecrîdî. Avûkatê Buroyê Huqûqî ya Asrinî Îbrahîm Bîlmez, dimayê pêvînayîşî bi CPTyî roportajo ke da de, da zanayîş ke CPT mektubê ke zîndanê Tirkîya ra şinê ra aciz o û înan dano zorî. Ma zî sey TJK-E qerardarê ke kutîyê postayî pirrî mektube bikerê. Ma startê kampanyaya mektuban 19ê Nîsane de Berlîn de da û hema zî dewam kena. Heta nika bi seyan mektubî şirawîyayê.”

 

 ‘Ganî şerê şoreşgêrî yê şarî bibo komelkî’ 

 

Kezbane qiseykerdişê xo wina qedêna: “Swîsre, Fransa, Almanya, Îskandînavya, Kanada, Belçîka, Hollanda û xeylê welatê bînan ra mektubî ameyî şirawitiş. Çarçeweya 'Hezar cinî û yew veng o’ her cayê dinya ra mektub yenê. Sere de Kurdistan ra, Latîn Amerîka ra, Afrîka, Hîndîstan, Pakîstan, Yewnanîstan û xeylê welatan ra vîdeo yenê. Felsefeya Rayber Apoyî cuya cinîyan bedilna. Cinîyê ke cuya înan bedilîya vîdeoyan ancenê û serê çapemenîya komelkî ra şirawenê. Wexto ke ma vanê azadîya Rayber Apoyî ma azadîya xo îfade kenê. Tena Rayber Apo nê şarê kurdî û heme cinî yenê tecrîdkerdiş. Na kampanyaye tabîî mird nêkena. Ganî şerê şoreşgêrî yê şarî bibo komelkî. Ganî seba çareserîye heme rayîrî bêrê ceribnayîş.”