Rojda Aydin

 

WAN – Rayîrbera Şûbeyê Tarim Orkam Senî ya Wanî Mizgîn Çelîk Tarhane seba mîtîngê herêmî ke bi wesîleya 1ê Gulane Roja Karkerê Dinya Wan de bi sloganê “Ma 1ê Gulane de bi hêvî, bi qerardarî û bi xoverdayîşî raşteyan de yê” bêro viraştiş vengdayîşê tewrbîyayîşî kerd. 

 

Netîceyê polîtîkayê şerî yê îqtîdarê AKPyî de welat de krîzê ekonomî roj bi roje giran beno û betalî û kedwerî her ke şino zêde beno. Karker bi wesîleya 1ê Gulane Roja Karkerê Dinya emser reyna raşteyan de do cayê xo bigîrê û waştişê heq, huqûq û edaletî bikerê û waştişê xo newera bikerê. Wan de bi serkêşîya Konfederasyonê Sendîkaya Kedkaranê Rayapêroyî (KESK), Yewîya Odeyê Muhendis û Mîmaranê Tirkî yê Wanî (TMMOB), Konfederasyonê Sendîkaya Karkeranê Şorişgêrî (DÎSK) û Odeya Tabîban ê Wan-Colemêrgî û Odeya Tabîbê Karî yê Wanî mîtîngê herêmî bêro viraştiş. Mîtîngo ke do Parka Musa Anterî de bêro viraştiş de do sloganê “Ma 1ê Gulane de bi hêvî, bi qerardarî û bi xoverdayîşî raşteyan de bê” berz bo. Kedkarê ke veng kenê vanê ke do waştişê xo de israr bikerê. 

 

Rayîrbera Şûbeyê Wanî ya Sendîkaya Kedkarê Şarî yê Şûbeyê Xizmetê Çinitiş û Daristanan (Tarim Orkam Sen) Mizgîn Çelîk Tarhane venga tewrbîyayîşê mîtîngê herêmî yê 1ê Gulan kerd. 

 

 ‘Seba heq, huqûq û edaletî raşteyan de bibê’ 

 

Mizgîne dîyar kerd ke seba heq, huqûq û edaletî ver bi 1ê Gulane rê şinê û ard ziwan ke welat de her raşteyî de kede yena werdiş û vat: “Citkar, cinî, xerîb, heta hemwelatijê xerîb ê welatî her ca de keda ma yena werdiş. Vera nê caardişan de ma do raşteyanê 1ê Gulane de qêrayîşê xo berz bikerê” Mizgîne da zanayîş ke do waştişê xo yê heq, huqûq û edaletî her ca de bîyarê ziwan û wina dewam kerd: “Her kesî rê heq, huqûq û edalet. Ma vanê ke êdî bes o. Ma her roje şenik benê. Ewro karmend nêşikenê çîyêk bikerê. Ne hetê madî û ne zî hetê manewî de nêşikenê pîl bibê. Madîyat seba merdiman bîyo problemêk psîlokolîjî. Yew sebebê tewr pîl ê şîdetê serê cinîye ekonomî yo. Na rewşe xeylê keyeyan de yeno ciwîyayîş. Ma vera nê çîyî de vanê êdî bes o. Babîyo ke nêeşkeno kincê mektebî tutê xo rê bigîro, întîxar keno. Qey no qewimîyeno? Qey welat hende şenik beno? Welat de çimeyê îdareyî est ê. Welat welatêke pîl o û bi hêz o. Ma her hetî ra welatêke bi hêz ê. Wexto ke ma sey muhendîsê çinitişî ewnîyenê çinitişî herra ma ya zaf dewlemend est a. Awanîyêke ma ya zaf xurt est a. Citkarê ma na babete de zaf baş û mirdê. Ma nê citkaran ê Ewropa ra hîna jîhatî vînenê. Semedo ke ma raşteyan de yê û vînenê. La xelata nê berardişî çin a û her raşteyî de wina ya. Problemê doktoran cîya yo, problemê mamosteyan zî cîya yo. Her raşteyê cuye hetê ekonomîye ra her ke şino şenik beno. Bi wesîleya na roje ma heme şarê xo dawetê 1ê Gulane kenê. Ma vanê ke ma heq, huqûq û edalet wazenê.”

 

‘Polîtîkayê şaşî bîyî sebebê nê çî’ 

 

Mizgîne, da zanayîş ke sebebê bingehîn ê problemê ekonomî û bêkarî yê Tirkîya polîtîkayê îqtîdarî yê AKPyî yo û wina vat: “Polîtîkayê şaşî yenê ca ardiş. Ez sey muhendîse eşkena vaja ke polîtîkayê ramitişî de xetayê cidî est ê û ma her warî de rastê eynî xetayan yenê. Ganî nê bêrê sererastkerdiş. Kesê ke a kursî de roniştê, lazim o çareyêk nê problemî rê bîvînê. Ganî polîtîkayê ramitişî bêrê vurnayîş. Ganî polîtîkayê wareyê bîn de bêrê vurnayîş. No bi no hawayî nîno rayîr ra berdiş. Ma welat vînenê, ma bi name benê. Seba ke na polîtîka bivurya ganî hukmat hîn tedbîran bigîrê û hin xebatan bikerê. Ma do nê çî  1ê Gulane de raşteyan bîyarê ziwan û wqştiş bikerê.”

 

 

Vengdayîşê seba mitîngî 

 

Mizgîne, bale ant serê mîtîngê herêmî yê ke do 1ê Gulane de Parkê Mûsa Anterî de bêro organîzekerdiş û nê vengdayîşî kerd: “Ma venga pêro şarê xo kenê; 1ê Gulane de ma heme vajê heq, huqûq û edalet. Êdî bes o.”