Dîlan Babat

 

ANQARA – Verfeka Meclîsê Cinîyan a DEM Partî Halîde Turkogluye xeta polîtîk a prosesê newîye ercna û vat ke mesaj û berpirsîyarîya şarî weçînayîşê herêmî de girewtê serê milê xo û do xerîtaya xo amade bikerê. Halîdeye vat: “Kampanyaya ma; kampanyaya rêxistinbîyayîş, hişmendîya îdeolojîk, perwerde û çalakîyan a.” 

 

Verfeka Meclîsê Cinîyan a Partîya Têduştîye û Demorkasîyî yê Şaran (DEM Partî) Halîde Turkoglu derheqê prosesê weçînayîş û kampanyaya ke do rojê verênan de bidê destpêkerdiş de ercnayîş kerd. 

 

‘Cewabê şarî zelal bî’ 

 

Halîdeye da zanayîş ke netîceyê weçînayîşî sere de seba cinîyan û heme komelî nîşaneyê demê newî yo û wina vat: “AKP-MHP xeylê cayan de vînî kerd. Kurdistan de polîtîkaya qeyûmî peynî bî. Ma faşîzmî tepîya vist. AKP bî partîya diyîne. DEM Partî 78 şaredarî bi dest fîna. Şar cewabêk muhîm da qeyûman. No xoverdayîş xoverdayîşê cinî, ciwan û şaran o.” 

 

 ‘Xoverdayîşê Wanî seba hukmatî bî cewab’ 

 

Halîdeye dewamê qiseykerdişê xo de wina vat: “Seba tepîyavistişê faşîzmî Tirkîya de babeta naskerdişê îradeyê şarîd e paştîdayîş virazîya. Bi wesîleya xoverdayîşê şarê Wanî hêzê demokrasî paştîdayîş awan kerd û îqtîdar mecbur mend fek polîtîkayê xo ra biverdo. Xoverdayîşê şarê Wanî seba hukmatî bî cewabêk muhîm. Ganî hukmat na rewşe ra dersan bivejno. Hemverê xoverdayîşê Wanî de û mesajê seba qeyûman ameyê dayîş de sîyasetê demokratîk nê mesaj û berpirsîyarî qebûl kerd. Ganî AKP, MHP û partîyê bîn yê sîyasî nê mesaj û berpirsîyarîyan qebûl bikerê. Moral û motîvasyono ke muxalefet weçînayîşê herêmî yê 31ê Adare ra girewt seba heme şaranê Tirkîya û kurdan muhîmîya sîyasetê demokratîke vejeno raşte.”

 

 ‘Xerîtaya weçînayîşî nîşan da ke şar kam ca de yo’ 

 

Halîdeye ard ziwan ke DEM Partî weçînayîşan de destkewtişêk muhîm bi dest fîna û wina dewam kerd: “No serkewtişê DEM Partîye ke Kurdistan de bi destfînaya tena seba partiye nê seba heme sîyasetê demokratîke yê Tirkîya û awankerdişê komara demokratîke, ganî sey hêvî û averşîyayîşêk bêro dîyîş. Adetê têkoşînê ma, cînsîyetperestî, yewperestî û netewperestî qebûl nêkeno. Ma partîya ke demokrasîyê herême temsîl kenê yê. Heme şaredarê ma do bi nê paradîgmayî bixebetê. Ganî ma berpirsîyarîya xo ya nê weçînayîşê tarîxî ke dayo serê milê ma bi moral û motîvasyonî xurt bikerê. Xerîtaya weçînayîşî mojna ke şar kam ca de yo.”

 

Meclîsê cinîyan de prosesê kampanyaya neweyî 

 

Halîdeye wina dewam kerd: “Demê neweyî de ma serê rêxistinbîyayîş û hîrabîyayîşî de vindertê. Hedefe ma no bî ke modelê DEM Partî Tirkîya de zêde esas bêro girwtiş. Rayîrberîyê herêmî raşteyo ke paradîgma ma bi herême reyde ameya têkişt a. Kombîyayîşê ma yê ke ma bi şaredarê xo reyde kerde model ame qiseykerdiş û do xizmetêk senî bêro kerdiş ame munaqaşakerdiş. Tabî qet şik çin o ke dîyarkerdişê perspektîfê sîyasî zî wezîfeyê meclîsê ma yo. Ma do nê demî de prosesê kampanyêke neweyî bidê destpêkerdiş û ma do bikerê rojeva kampanyaya xo. Kampanyaya ma; kampanyaya rêxistinbîyayîş, hişmendîya îdeolojîk, perwerde û çalakîyan a.”