AMED - Hemserekê Pêroyî yê DBPyî Keskîn Bayindir şi serdayîşê Dayîkê Aştîye û serdayîş de wina vat: “Semedê çareserîya problemê kurdî ganî tecrîd bêro wedaritiş, Abdullah Ocalan azad bibo û meselaya kurdî bi rayîrê demokratîke çareser bibo. Lazim o ma  têkoşînê xo tewr pîl bikerê.” Sewbîna Dayîkê Aştîye zî dayî zanayîş ke ganî destpêk de berê Îmraliyî abibo û tepişteyê ke zîndanan de yê bêrê veradayîş. 

 

Hemserekê Pêroyî yê Partîya Herêmê Demokratîke (DBP) Keskîn Bayindir şî serdayîşê endamê Meclîsê Dayîkê Aştîye yê Rezanê Amedî. Verfeka Meclîsê Cinîyan ê DBPyî Bêrîvan Bahçecî, hemserekê DBPyê bajar û qezaya Rezanî, parlamentera DEM Partî ya Wanî Gulderen Varli û endamê MYKyî zî serdayîş de ca girewtî. Dayîkan, heyetî verê berî de pêşwazî kerd. Keskînî, semedê hêrişê hemverê dayîkan ê Silopîya hêvîya başî û silametî kerd. 

 

Dayîkî fek xoverdayîşê xo ra vera nêdanê

 

Keskînî, sere de xoverdayîşê dayîkan ê Silopîya pîroz kerd û wina vat: “Xoverdayîşê şima, ma serfîraz kerd. Ma zanê ke dayîkî tena Silopiya de nê, meclîs de heta zîndanan, xeylêk cayan de xo ver danê. Dayîkî heta ke netîceyêke bi dest kenê zî fek xoverdayîşê xo ra vera nêdanê. Grevê vêşanîye yê serra 2019ine zî bi xêrê xoverdayîşê dayîkan resa netîce. Ma rojanê zehmetan ciwîyenê la ganî ma hêvî û bawerîya xo zêdeyêr bikerê. Bi 10 serrî yo dewlete polîtîkayêke cîya daya vernîya xo. Wazenê têkoşînê kurdan bitefênê. La nêeşkenê. Sere de dayîkî, cinî û ciwan, şarê kurdî vindertişêk tarîxî mojna. Ma bedelê giran da û xoverdayîşêk pîl mojna. No serkewtiş û xoverdayîşo pîl zî vernîya ma akerd. Ganî ma yewî û rêxistiniya xo pîlêr bikerê û semedê destkewtişê somutî yê huqûqî û dîplomatîk têkoşîn zêdeyêr pîl bikerê. Ma do têkoşînê Kurdistanî tu wext peynî nêkerê. Kurdî tena bi xoverdayîş û têkoşîn eşkenê serkewte bibê.”