Derya Ren 

 

RIHA - Dengbêje Feryal Gokkan ke Pirsûs ra ya, hemverê serdestîyê camêrdî de têkoşîn kena û dîyar kerd ke bi zorî kesêk 27 serrî aye ra pîlêr dir ameya zewicnayîş û nêwazena peynameyê ey bişuxilno. Feryale vat: “Ez zewicya ya û keyeyê ke ez şîya, sey  goristan bi mi rê. Semedo ke ez uca ra dûr bikewî, her tim deyîran vana.”

 

Kulturê dengbêjî her çiqas sîstemê serdestî yê camêrdan dir bêro mojnayîş zî serkêşê ci cinîyê kurdî yê û serrê peyîn de no zêdeyêr ame vînayîş. Feryal Gokkan ke Pirsûsê Rihayî de ciwîyena, nînan ra yew a. Feryale bi deyîranê xo, hemverê nêtêduştîya cinsî de bena veng. Heto bîn ra zî peynameyê camêrdo ke ci dir zewicîyaya zî teberê sazgehê fermî de nêşuxilnena û hemverê sîstemê serdestî yê camêrdî de têkoşîn kena.

 

Feryale derheqê cuya dengbêjî de, kodê sîstemê serdestî yê camêrdî de qisey kerd.

 

Bi kesêk ke 27 serrî ci ra pîlêr bî ameye zewicnayîş

 

Feryale da zanayîş ke keyeyêk kanperestî de pîl bîya û 16 serrî de sey hêwî, kesêk ke 27 serrî ci ra pîlêr dir  ameya zewicnayîş. Feryale wina dewam kerd: “6 tutê ey est bî. Mi ewnîyayîne tutanê ey ra. Vernîya ke ez bizewicîyî, xeylêk xeyalê mi est bî. Mi emrê qijî de xo nas kerd la pêwa nê mi nêeşkayîne çîyêk bikerî. Cinîyan ser o tedayê camêrdan zêde yo. Mi waşt ez semedê cinîyan bibî nimûne. Badê 3 tutê mi virazîyayî. Mi radyo goşdarî kerdêne. Mi xo kerdêne vera înan. Mi waştêne têkoşînê cinîyan nas bikerî. La her tim astengî virazîyayîne. La badê ke tutê mi pîl bîyî, mi game eşt.”

 

‘Sey goristanî bî’

 

Feryale dîyar kerd ke serra 1990î de ameya zewicnayîş la tu wext zewac qebûl nêkerda û wina vat: “Ez bi deyîranê Eyşeşane û Meryemxane pîl bîya. Mi înan goşdarî kerdêne. Mi nimûne girewtêne. Wexto ke ez zewicîyaya keye mi rê sey goristan bî. Mi xo ê hawirî ra dûr fîna û deyîran vat. Mi tu wext sere nêtewêna. Mi sey cinîyêke têkoşînê xo kerd. Mi tutanê xo rê saz, gîtar û erbane girewt. Mi vernîya înan akerd. Nika herî rê zî eşkenê estrumanan bidê. Ez 8ê Adare de deyîran vana. 2023ine de semedê xebatê partîya ra ameya tepiştiş. 8 aştî tepişte menda. Mi zîndan de hevalanê xo rê deyîran vatêne.  Mi moralê înan berz kerdêne.”