Melek Avci

 

ANQARA - Parlamentera EMEPÎ Sevda Karaca derheqê munaqeşeyê prosesî de qisey kerd û vat: “Îdarekerdişê yew camêrdî yê teber û zere de xitimyayo est o. Hetêk ra hewl dano fonê paştdayîşê sanayîya pawitişî pê bîyaro û heto bîn ra zî aştî qisey keno. No nakokîyêk pîl o.”

 

Sevda dîyar kerd ke problemê kurdî semedê polîtîkaya înkar û îmhayî yê îqtîdarî bi serran a dewam kena û AKP 22 serrî yo bi terefgiranê xo problem giran kerdo. Sevda wina ard ziwan: “Her rey problemêk vejîya vernîya înan û vatî, problemê kurdî çin o û ma kurdan qedênayê. Ewro wurzenê reyke de problem anê xo vîr û ci ra nêvanê çareserî zî proses danê destpêkerdiş. La derheqê nê de her roje vatişê newe yenê. Devlet Bahçelî vat, ganî tecrîd wurzo. Ozgul Ozel zî sozê welatîbîyayîşê têduştî da.” 

 

‘Me hema vatişêk aştî nêeşnawito’

 

Sevda vat, heta ke gamêke somut nêro eştiş, mumkin nîyo ke merdim pozîtîf qisey bikero û wina vat: “Ganî îqtîdar xêrcê înkar û tedayî çîyo ke wazeno bikero, dayê werte. Waştiş û lazimî bi çareserîyê meselaya kurdî est o. La hema ma îqtîdarî ra gamêke pozîtîf, vatişêk aştî nêeşnawito.”

 

‘Semedê çareserî ganî operasyonî bêrê peynîkerdiş’

 

Sevda, dîyar kerd ke semedê şert û mercê aştî bêrê awankerdiş, ganî game bêrê eştiş û wexto ke game nêro eştiş, nê tena vatişî de manenê. Sevda wina vat: “Ganî vernê de qeyûm bêro antiş, operasyonî peynî bibê, tecrîd peynî bibo. Tepişteyê sîyasî bêrê veradayîş. Semedê planê emperyalîstî veng vejîyê, berpirsyarî kewena ser milê pêro kesan.”

 

‘Abdullah Ocalan muxatab o’

 

Sevda babeta çareserîyî de Îmrali mojna û vat: “Semedo ke meseleya kurdî ameya girankerdiş, bi serran o şarê kurdî hemverê teda û hêrişan têkoşîn keno. Bedelê pîlî dayî. Semedê nê muxatabê sereyîn bêşik şarê kurdî, karker û kedkar ê. Muxatabo esas bêşik Abdullah Ocalan o. Semedê aştî û diyalogî ganî pêvînayîş Îmraliyî dir bêro destpêkerdiş.”