Memîhan Zeydan

 

WAN - Cinîyan derheqê çeteyê şantajî yê ke bi rayîrê cinîyanê ke xapênenê, şantaj kenê û pereyan qezenc kenê, dîyar kerdî ke nê çeteyî bi polîtîkayê xo yê bêcezakerdişî yenê teşwîqkerdiş û na rewşe parçeyêke polîtîkayê şerê taybetî ya û vatî: "Ma do sey cinî, hemverê nê de xo ver bidê. "

 

Ame dîyarkerdiş ke Wan de hetê camêrdo bi nameyê Ozcan Polat ra xeylêk kesî şantajî dir rî bi rî mendê ke xeylêk dosyeyê ci yê bi taybetî tiryakî est ê, bi rayîrê cinîyan fotografê ke munasib nîyê camêrdan arê dayê. Eynî wextî de ame zanayîş ke Ozcan Polat ke cinîyan kerdo mîyanê tîryakî û tehdîd cinîyan rê kerdo. 

 

Cinîyan derheqê çeteyê şantajî yê Wanî de qisey kerd.

 

'Çeteyê şantajî netîceyê polîtîkayê şerê taybetî yê'

 

Hemşaredara Rêya Armûşî Canan Uzunay, dîyar kerd ke netîceya polîtîkayê şerê taybetî de bi taybetî Kurdistan de komê çeteyê bi nê rengî vejîyayî werte û vat: “Herême de polîtîkayê şerê taybetî xirabêr benê, semedo ke şar bi taybetî ciwanî ziwan û kulturê xo ra dûr bikewê, na polîtîka yena kerdiş. Ma qebûl nêkenê ke Ozcan Polat Wan de bi sîyakerdişî cinîyê ciwanan pere qezenc bikero. Ganî tu cinî nê bajarî de bîyayîşê çeteyê ke amancê înan qijvistişê cinîyan o qebûl nêkero."

 

'Ma do hemverê polîtîkayê şantajî de vinderê'

 

Canane dewam de wina vat: “Ma înan ra vanê, hevalê xo yê cinî, la rastî de tutê ke hetê nê çeteyan ra ameyê xapênayîş est ê. Çîyê wina semedê polîtîkaya bêcezaverdayîşî yenê teşwîqkerdiş. Eke Colemêrg de kesê bi polîtîkayê şerê taybetî têgêrenê, biameyîne cezakerdiş, ewro Ozcan Polatî nêeftarayîne nê çî bikero. Venga mi semedê pêro Wanî, dayîkan û pêro şarî no yo; ganî ma pêro mil bi mil hemverê nê polîtîkayê şantajî xo ver bidê. Ma zanê ke kesê bi nameyê Ozcan Polat hetê kesêk ra yeno pawitiş û teşwîqkerdiş. Ma do sey cinî hemverê nê de vinderê û têkoşînê ke bi serran o est o, dewam bikerê."

 

'Ma do destûr nêdê polîtîkayê şerê taybetî'

 

Hemşaredara Tûşbayî Hanim Akkoş, bale ant serê polîtîkayê şerê taybetî yê hemverê cinîyanê ciwanan de yeno kerdiş û vat, “Ma do rayîr nêdê polîtîkayê şerê taybetî yê çeteyê şantajî yê Wanî de yeno kerdiş. Ma do têkoşînê xo yê cinîyan hemverê çeteyê şantajî de hîra bikerê."

 

'Ma do zorê polîtîkayê şerê taybetî berê'

 

Endama Meclîsê Şaredarîya Elbakî Hîvîdar Bayer dîyar kerd ke polîtîkayê şerê taybetî dir tiryakî, fuhûş û şantajî zêde bîyî û vat, “Ma wazenê ke kesê bi nameyê Ozcan Polat cezaya ke heq keno, demêk lez de bigîro. Ma soz danê ke ma do bi têkoşînê cinîyan polîtîkayê şerê taybetî werte ra wedarnê.”