Melîke Aydin

 

AYDIN - Binpaykerdişê heqan û şîdetê cinîyan ser o puçbîyayîşê komelî yê Tirkîya mojneno. Temsîlkara EŞÎKî Gulnu Akspo derheqê babete de qisey kerd û vat: “Komelêk têduştî, azad û bêşîdet de ganî cinî vengê xo berz bikerê. Paştdayîşê cinî hemverê krîzê komelî de xoverdayîşê tewr xurt o.”

 

Serranê peyîn de Tirkîya de binpaykerdişê heqan yê hemverê cinî û tutan de zêde bîyî. Demê peyîn de şîdetê cinîyan ser zêde bî û demêk kilm de no rojeve ra vejîyeno. Nê zî munaqeşeyê krîzê sosyokulturel û exlaqî newe ra ard rojeve. Binpaykerdişê heqan û şîdetê cinîyan ser o puçbîyayîşê komelî yê Tirkîya mojneno ra.

 

Temsîlkara Platformê Semedê Cinîyan Têduştî (EŞÎK) Gulnur Aksop derheqê babete de JINNEWSî rê qisey kerd.

 

‘Vindîkerdişê exlaqî û dezgehanê dewlete de puçbîyayîş’

 

Gulnure da zanayîş ke Eden de rojêke de 6 cinî ameyî qetilkerdiş, rojê vîyarte de di camêrdan hewl dayo ke kuçe de desteştişê cinîyêke bikerê û vat: “Stenbol de mîyanê nîm saete de di cinî bi îşkence ameyî qetilkerdiş. Defneyê Hatayî de bi rojan o cinîyêke hemverê birnayîşê daranê zeytûnan bi tena sereyê xo têkoşîn kena. No welat de ma mûsayî ke çeteyê bebekê yenîdoganî est ê. Nê çeteyî Stenbol de bî sebebê merdişê 12 bebekan. Xeylêk nêweşxaneyê taybetî hemkarê nê cînayetan ê. Nê çeteyî tena SGKyî nêşelênenê, eynî wextî de sektorê kozmetîk û neqlê organan de zî gonîya bebekan şuxilnenê. Wareyê ekonomî, weşî û komelî de puçbîyayîşêk est o.”

 

‘Cinî vengê xo berz bikerê’

 

Gulnure qiseykerdişê xo de dîyar kerd ke no puçbîyayîş tesîr serê heme çî de kerdo û vat: “Bêhêvîtî, şîdet, cînayet, întîxar, talan, hemkarîya zûran û sewbîna çî. Nê şertan de cano ke biveşo, nê vengî vejeno. Nê vengî zî yenê binpaykerdiş. Ganî cinî vatişê xo vajê û çalakîyê xo dewam bikerê. Ganî ma hemverê nê de vinderê û nê puçbîyayîşî ra êdî vajê bes o. Îradeyêk cuya azad, têduştî û bêşîdet encax cinî eşkenê ramojnê û cuyêka azade awan bikerê.”