Arjîn Yuksekbag

 

ANQARA - Cinîyê ODTUyî 2016ine de ‘Dêsê Cinîyan’ viraştê û hemverê nê de hêrişî virazîyenê. Cinîyan vatî, hêrişî bi taybetî hemverê sloganê "Jin jiyan azadî" yo û vat, çi beno wa bibo terorîzekerdişê nê sloganan qebûl nêkenê û venga têkoşînî kerdî.

 

Unîversîteya Orta Dogu Teknîk (ODTU) bi adetê xoverdayîşê xo tarîx de ca girewta û nê deman hêrişê ke yenê kerdiş, nê ra xoser nîyê. Dêsê Cinîyan ke 2016ine ra yeno zanayîş û wayîrê cayêk muhîm o, hetê rektorî û komê faşîstî yê sey 'Turkolojî’ ra rastê hêrişan yenê. 

 

Cinîyê ODTUyî derheqê hêrişan de ajansê ma JINNEWSî rê qisey kerdî.

 

Îrem Naz Çelîk ke wendekara ODTU ya wina qal kerd: “Semedê cinîyê ODTU û Lubunyayiyan dês wayîrê manayêke muhîm o. Demê Cizîr û Sûrî de merdimî ameyî veşnayîş, ma cinîyan aştî waştêne û cinîyan nê dêsî boyax kerd. Her çiqas no dês mîyanê demî de bêro pakkerdiş zî ma newe ra boyax kerd, sloganê ‘Ma cinî aştîye de bi israr ê û hemverê qexeyan şer bikerê’ badê zêde bî. Coka no dês zaf muhîm o.”

 

‘Peymana Stenbolî bi waştişê yew camêrdî ameye wedaritiş’

 

 

Îremê Naz Çelîk bale ant qetilkerdişê cinîyan ser û wina vat: “Pêro hêrişê hemverê cinîyan, vînîbîyayîşê Rojîne, ancî hedîseya Narîne û xeylêk cinî û tutan netîceya polîtîkaya înan a. Qanûnê 6284 pê nîno. Peymana Stenbolî bi waştişê yew camêrdî şewêke de ameye wedaritiş. Semedê pawitişê cinîyan ganî 6284 pê bêro. Qanûnê qetilkerdişê heywanan yeno tesdîqkerdiş. Her cayî ra boya gonî yena. Ganî ma bibê yew veng û vengê xo berz bikerê”

 

‘Ma cinî hetê aştîye yê’

 

Wendekare Rona Polen Kavan derheqê teda û hêrişan de ercnayîş kerd û vat: “Bi serran o pêwa pêro hêrişan cinî hema dêsan pawenê. No dês venga aştîye ya cinîyan temsîl keno. Ewro hemverê şîdetê camêrd û şerî de têkoşînê cinîyan ê enternasyonal dewam keno. No dês semedê azadbîyayîşê pêro cinîyan vengêk o.”

 

‘Wazenê Jin jiyan azadî terorîze bikerê’

 

Rona Polen Kavan dîyar kerd ke bi hîrê ziwanan "Jin jiyan azadî" nuştê û ewilî hemverê kurdî de hêriş kerdê û hewl dayê terorîze bikerê. Rona Polan Kavan wina vat: “Welat de hêrişî her ke şinê zêde benê. Hewl danê her çî terorîze bikerê. Bi destê faşîstan wazenê ODTUyî birijnê. Ma do destûr nêdê faşîzm û têkoşînê xo berz bikerê. Biciwîyo têkoşînê cinîyan.”