Keyeyan semedê pêvînayîşî muracatê Îmraliyî kerd 

2024-11-01 13:55:55


	 

	 

	STENBOL - Keye û vasîyê Raberê PKKyî Abdullah Ocalan semedê pêvînayîşî muracatê Serdozgerîya Komare ya Bursayî û Mudurîyê Zîndanê Îmraliyî kerd. 

	 

	Tecrîdê girankerde yê Rayberê PKKyî Abdullah Ocalan ser û tepişteyanê bînî Omer Hayrî Konar, Hamîlî Yildirim û Veysî Aktaş ke Zîndanê Tîpê Fyê Asayîşê Berzî yê Îmraliyî de yenê tepiştiş, dewam keno. Birayê Abdullah Ocalanî, Mehmet Ocalan û vasîyê ey Mazlum Dînç bi waştişê pêvînayîşî muracatê Serdozgerîya Komare ya Bursayî û Mudûrîyê Zîndanê Îmraliyî kerd. Eynî wextî de waya Omer Hayrî Konar, Emîne Konar, birayê Hamîlî Yildirim Polat Yildirim û waya Veysî Aktaş, Melîhe Çetîn zî bi eynî waştişî muracatê dozgerî û mudurîyê zîndanî kerd.

	 

	Heqê pêvînayîşî keyeyan yê Abdullah Ocalan û 3 tepişteyê bînî yê Îmraliyî de yenê tepiştiş, bi sebebê “cezaya disiplînî” yenê astengkerdiş. Mabêne serranê 2021-2024ine de 7 rey Abdullah Ocalan û tepişteyê bînî semedê 3 aşman cezaya disiplînî ame dayîş û pêvînayîşê keyeyî dir ame astengkerdiş. Pêwa pêro muracatan zî cezaya disiplînî û hûmara dosyayan avûkatan dir nêame parekerdiş. 

	 

	Keyeyê Abdullah Ocalanî pêvînayîşê rî bi rî yê tewr peyîn 3yê adara 2020ine de û pêvînayîşê serê telefonî zî 25ê adara 2021ine de kerdibî. Badê 4 serran, biraziyê Abdullah Ocalanî, Omer Ocalan 23yê teşrîna verêne 2024ine de pêvînayîşê rî bi rî kerd. Pêvînayîş de Abdullah Ocalan dîyar kerd ke tecrîd hema zî dewam keno.