STENBOL - Endama Meclîsa Jinên Ciwan a HDK'ê Eda Kalafat diyar kir ku ew ê di çarçoveya banga Rêberê Gelê Kurd Abdullah Ocalan a 27'ê Sibatê de li her aliyê civakê xwe birêxistin bikin û got, "Em bang li her kesî dikin ku banga Rêbertiyê ya ji bo rêxistinbûneke xurtir û avakirina Civakeke Demokratîk hembêz bikin."

 

Piştî banga Rêberê Gelê Kurd Abdullah Ocalan a ji bo "Aştî û Civaka Demokratîk" a di 27'ê Sibatê de, gelek pêşketinên dîrokî qewimîn. Di nav van pêşketinan de peyama "Sosyalîzm tê wateya civakê, tê wateya komunalîzmê. Siyaset li Kurdistanê divê bi vê têgihîştinê were meşandin" heye, ku ji hêla ciwanan ve hate pejirandin û pêşengî lê hate kirin û di roja jidayikbûna Abdullah Ocalan de di 4'ê Nîsanê de hate weşandin. Endama Konseya Jinên Ciwan a Kongreya Demokratîk a Gelan (HDK) Eda Kalafat ji JINNEWS'ê re axivî û diyar kir ku ew ê li ser bingeha vê peyamê tevgereke ciwanan ava bikin ku civakê tax bi tax, kolan bi kolan rêxistin bike.

 

'Em li benda rêxistineke îdeolojîk in'

 

Eda Kalafat diyar kir ku ew ê bi banga Rêberê Gelê Kurd Abdullah Ocalan a ji bo "Aştî û Civaka Demokratîk" bikevin pêvajoyeke siyasî ya nû û diyar kir ku hemû hewldanên wan li gorî banga 27'ê Sibatê tên kirin û got: "Peyama Rêber, ku di 4ê Nîsanê de hat weşandin, bang li ciwanan kir ku 'Birêxistin bibin, rêxistin bikin.' Em xebata xwe ya rêxistinî li gorî banga Rêber pêk tînin. Em kategoriya ciwanan wekî kategoriyek bi naveroka îdeolojîk fam dikin ku rê li ber rêxistineke civakî vedike. Em hewl didin ku ciwantiyekê ava bikin ku civakê, tax bi tax, kolan bi kolan rêxistin bike. Ev pratîk di serî de têkoşînek li dijî şerê taybet vedihewîne. Ji ber ku pergal bi gelek amûran, nemaze bi madeyên hişber, êrîşî ciwanan dike. Rastiyeke wêrankirina civakî û çandî heye. Em li dijî hemû amûrên din ên şer, nemaze li dij madeyên hişbirê, rêxistineke îdeolojîk hêvî dikin. Wekî xebatkarên ciwan, em van hêviyan pêk tînin." 

 

'Têkoşîna me dê her dewam bike'

 

Eda Kalafat, bi bîr xist ku gelê Kurd bi salan e rastîyek qirkirinê dijî û diyar kir ku ew ê heta ku aştî pêk were têkoşîna xwe bidomînin. Eda Kalafat, wiha domand, "Ev hem aliyekî şerê hov e, hem jî rastiyek e ku mirov tên qirkirin. Her wiha aliyekî qirkirina çandî jî heye. Aliyekî din jî bi rêya asîmîlasyon, polîtîkayên şerê taybet û qedexekirina zimanên xwecihî û stranên ku bi zimanên xwecihî têne gotin tê kirin. Li ser vê axê mînakên mîna Fatma Altinmakas hene. Rastî hene ku mirov ji ber ku nikarin gilî û gazinên xwe bi zimanê xwe yê dayikê bînin ziman têne kuştin. Dayik hene ku dema serdana xizmên xwe yên di girtîgehê de bi Kurdî diaxivin, tên îşkencekirin. Dema ku em dibêjin aştî, mebesta me naskirin û afirandina mafê beşdarbûna wekhev û azad di her aliyê jiyanê de, bi zimanê xwe yê dayikê û bi nasnameya xwe ye. Têkoşîna me ya xweparastinê dê her tim heta ku aştî pêk were dewam bike."

 

'Divê gavên pêwîst werin avêtin, divê tecrîd were rakirin'

 

Eda Kalafat, diyar kir ku wê hîn jî ji dewletê tu gavek berbiçav a der barê pêvajoyê de nedîtiye û tekez kir ku divê hemû alî berpirsiyariyê bigirin ser xwe. Eda Kalafat got ku gava herî bingehîn û girîng a ku divê were avêtin, rakirina tecrîda li ser Abdullah Ocalan hatiye ferzkirin û misogerkirina azadiya wî ya fîzîkî ye. Eda Kalafat, wiha domand: "Rêber Apo hîn jî di tecrîdê de ye. Ger hûn behsa naskirina gelekî dikin, ger hûn behsa avakirina aştiyeke bi rûmet bi wan re dikin, divê tecrîd rabe. Bi tevahî nayê qebûlkirin ku ew di girtîgeha Girava Îmraliyê de dîl were girtin. Ev ne tenê meseleya azadiya fîzîkî ya kesekî ye. Em behsa wê yekê dikin ku kesekî ku ji hêla gelekî ve ku bi salan e ji bo azadiya xwe têdikoşe wekî rêber hatiye hembêzkirin, wekî dîl hatiye girtin. Ji ber vê yekê, gava herî bingehîn û girîng a ku divê were avêtin, rakirina tecrîda li ser Rêber hatiye ferzkirin û misogerkirina azadiya wî ya fîzîkî ye. Em bawer dikin ku divê berpirsiyarî di derbarê hemî amadekariyên pêwîst ji bo naskirina neteweyekê û ji vê wêdetir, gavên ku divê ji bo civakîkirina aştiyê werin avêtin de were girtin."

 

'Em rêxistinkirina bi pêşengiya jinan didin pêş'

 

Eda Kalafat, diyar kir ku rola jinan di têkoşînên şoreşgerî de rola herî pêşeng e û got: "Ji bo avakirina civakek azad, em rêxistinkirina bi pêşengiya jinan didin pêş. Pêvajoyek di rê de ye, lê em dibînin ku ev polîtîkayên malbatî bi hêzek pir xurt êrîşî jinan dikin. Komkujiyên jinan bi awayekî dramatîk zêde bûne. Pergal ji her jinek ku li vê axê dimire berpirsiyar e. Em vê yekê pir baş dizanin. Ji ber ku bi qanûn, dadwerî, pergala hiqûqî û zîhniyeta dewletê ya bi pêşengiya mêran di nav saziyê de, ev komkujiyên jinan pêk tên. Ji ber vê yekê, ew ji bo jinan cîhekî nahêlin ku bijîn. Ji ber vê yekê, em dixwazin vê bangê berî her tiştî ji ciwanan û hevalên xwe yên jin re bikin: em pir baş dizanin ku îdeolojiya her rêxistinekê, çi parlamento be, çi komun be, çi kooperatîf be, an tiştekî din be, bêyî jinan nikare hebe. Di vê wateyê de, divê em banga Rêbertiyê ya ji bo rêxistinê hembêz bikin û di her warî de piştgiriyê bidinê. Em bang li we dikin ku hûn têkoşîna me xurt bikin û bi awayekî rêxistinkirî civatek demokratîk ava bikin.”