![](/staticfiles/news/236876/2024/07/02/823x463cc-amd-02-07-24-adalet-kaya-dedas-rop-mansettttt.jpg)
‘Vilabîyayîşê şewatî netîceyê polîtîkayê dewlete yê’
- 10:55 2 Temmuze 2024
- NAROJANE
Şehrîban Aslan
AMED - Parlamentera DEM Partîye Adalet Kaya, dîyar kerd ke merdişê şewatê Amed û Mêrdînî de netîceyê polîtîkayê DEDAŞî û dewlete de pê ameyo û dîyar kerd ke polîtîkayê qeyûman zî tesîrêk pîl kerdo.
Şewato ke 20ê Hezîrane de dewanê Şemrex û qezayanê Çinarî ya Amedî de rî da, 15 kesî û bi hezaran ganeyan dinyaya xo bedelnayî û nêzdîyê 50 hezar dekar erd zî veşa û bi welî. Hemverê şewato ke netîceyê çîkê ke dîrekê ceryanî de vejîya, reaksîyonê şarî hemverê DEDAŞî û dewlete de dewam kenê, Parlamentera Amedî ya Partiya Têduştî û Demokrasî (DEM Partî) Adalet Kaya dewê ke şewat vejîya, sere de kîşte dewijan de vinderte. Adalete zilmo ke DEDAŞ Kurdistan de şarî rê keno, ercna.
'DEDAŞ bi hawayêkê keyfî muamele keno'
Adalete, derheqê şewatî de wina vat: “Ma eşkenê nê hetê Kurdistanî de wina bierjnê; semedê visnayîşê ceryanî yê zêde, hacetê şarî veşayî. Şar xizmeto ke ganî hetê îstîmlakî ra bêro kerdiş, şîrketî ra gêno. Sewbîna berardişê seranserê Tirkîya ceryanê qaçax şuxilnenê. Semedo ke vayîya ceyranî zaf zêde bîya. DEDAŞ tenê bi sebebê 'ceryanê kaçax' elektrîkê dewan, citkar û pesdewarkaranê Kurdistanî bi hawayêkê keyfî qut keno. No zirar dano her kesî.”
'Şar ame sûcdarkerdiş'
Adalete, dewam de wina vat: "Xizmetê DEDAŞî bi kablo û dîrekê ceryanî yê serranê 80î ra sînordar mendo. Şar hetê DEDAŞî ra ameyo mexdûrkerdiş, edlîyeyan de bi seyan dewayî est ê. Tîya helwestê dihetî, yanî caardişê Tirkîya û Kurdistanî sey yewbînan nîyo û polîtîkaya cîyayî yena kerdiş. Semedo ke DEDAŞî seke ma şewatê Çinar û Şemeraxî de vîna, bi heme bêhuqûqîyê xo seperneno dewlete û ci ra hêz gêno. Waliyê Amedî rastî înkar kerd û rasterast şarî sûcdar kerd. La dima ra vejîya werte ke şewat merdiman ra nê, kabloyê ceryanî yê DEDAŞî ra vejîyayo û nê semedî ra şewat ra 15 kesan dinyaya xo bedelnayî. Ancî keyeyan xisarê madî yê giran dîyî."
'Hukmatî wezîfeyê xo pê nêard'
Adalete bale ant serê bêtedbîrî û wina vat: “Yewin sazgeho ke ganî DEDAŞî teftîş bikero, Wezaretê Enerjî yo. Dima ra walî û qeymeqam ke demê xo de mudaxele nêkerdê û dima ra zî îdarekarîyê herêmî û rêxistinê sivîl ê. Wexto ke ma ewnîyenê şaredarî 8 serrî yo binê îdarekarîyê qeyûman de yê. Hacet û personelê qîm nêkerdêne. Tewr peyîn STK est ê, xora ê wezîfeyê xo ca anê. Ganî hukmato merkezî wezîfeyê xo ca biardêne. Semedo ke no nêameyo kerdiş, şar bi hawayêkê xozayî reaksîyon mojneno û vano, 'Semedo ke ma kurd ê, nêameyî adir nêtefînayî.”
'Şaredarî ma 8 serrî yo binê îdarekarîyê qeyûman de bî'
Adalete ard vîr şewato ke Balikesîr û Ayvalik de vejîya, şewe bi helîkopter tefînayî û vat, "Ma nê çî tu wext qebûl nêkenê û ganî pêro berpirsîyar bêrê cezakerdiş. Eke no 8 serrî qeyûm nêbîne û hetê hemserekanê ma û endamê meclîsê şaredarî ra şaredarî biameyîne îdarekerdiş, belkî no şewat nêvejîyayîne. Beno ke tedbîrê vernîgirewtişî biameyîne girewtiş û ma bi rastî na mana de şaredarîyê xo bawer kenê. Paradîgmaya ma ya azadîwaz, ekolojîk û demokratîke ê cinîyan do ca bêro. Çend rey ê dewan de şewat vejîyabî la reya ewil o ke hende pîl vejîya. No pêro îhmalkarî ra bi.”